Shillong, Naiwieng 05 : Ka Sorkar Jylla kala rai ban pynlong ia ka Anti-Narcotics Task Force (ANTF), kum ka kynhun Pulit ba kyrpang ka ban pynleit jingmut ha ka jingiakhun ia ki kam khaii droks ha Jylla.
Ia kane la pyntip da u Myntri ka Tnad Social Welfare Bah Paul Lyngdoh hadien ka jingialang bad ka kynhun ka seng Hynniewtrep Youth Council (HYC) hynne ka sngi Ba-ar.
Haba kren sha ki nongthoh khubor, u Bah Paul ula ong ba ki kam kynthup ia ki mat bala wanrah da kane ka Seng bad kiwei kiwei, yn sa rah ban iakren ha ka jingialang ban wan jong ka Drug Reduction Elimination and Action Mission (DREAM) ka ban pyniaid da u Symbud Myntri Rangbah ba khmih ia ka kam Pohiing (Police) Bah Prestone Tynsong, ka ban long la 14 tarik Naiwieng.
Ula pyntip ba kane ka jingialang kan iakrren ia ki buit bad ki lad ki lynti kiba tang shipor, kiba kham slem bad ki ban neh slem.
Haba pynpaw ba ka Sorkar kala kut jingmut shisha ban tehlakam bad rat dyngkong ia ka kam khaii droks, u Myntri ula ong ba ka jingkongsan jong kane ka jingialang la 14 tarik Naiwieng ka long ba kan don ka jingiapeit thymmai ia ki lad ki lynti bad ki buit treikam ban iakhun ia kane ka jingeh.
U Bah Paul ula pynbna ruh ba ka Sorkar kala rai ban pynlong ia ka ANTF, ka kynhun ki Pulit ba kyrpang ban iakhun pyrshah ia ka kam khaii droks ha Jylla.
“Ngin sa pynleit jingmut kham bun halor ka jingdonkam ban pynkhlain ia ka ANTF. Ngin pynlong ia ka ANTF ka kynhun kaba kyrpang ka ban nym shah the than ha kiwei ki kam Pulit, kumba la jia mynta” ula ong.
Halor ka jingpynpaw ki kynhun Sengbhalang ba don ka jingiatreilang ki Pulit bad nongkhaii droks, u Bah Paul ula ong “Ka jingtyrwa ban pyniakhlad noh ia ka ANTF na kiwei ki kam Pulit ka long namar ngi kwah ban pynduna lada don kaba kum kata ka kam kaba lam sha ka jingsuba sniew ia ka Tnad Pulit bad ka jingduh jingshaniah hynrei ia kane lah ban weng da ka jingbuh ia ka kynhun ba kyrpang ka ban pynleit jingmut beit thik tang ia ki kam khaii droks”.
Na ka liang kaHYC kala aiti ia ka dorkhas sha u Myntri, kala kdew ia ka jingdonkam ia ki jaka ai jingsumar bad jingiarap, ka jingdonkam ban pynbun ia ki Centre, Detoxification, OST bad Day Care Centre, ban buh ia ki Fast Track Court/ Special Court, ka jingtohkit ban pynngat pynsajia ia ki case hapoh ka NDPS Act, PITNDPS Act, 1988, ban wanrah ia ka office ka Narcotic Control Board (NCB) ha Shillong.
Haba pynpaw ba ka jingialang ka long kaba sngewtynnad, u Bah Paul ula ong “Nga la shim ia ka kabu ban batai sha ki nongialam kane ka Seng ba nyngkong eh ka Sorkar kala pynbna ia u Mission Director ba thymmai ka DREAM, uba dei u Bah FG Kharshiing, Ophisar IPS bala shongthait bad kiwei kiwei ki kam”.
 ka ban pyniaid da u Symbud Myntri Rangbah ba khmih ia ka kam Pohiing (Police) Bah Prestone Tynsong, ka ban long la 14 tarik Naiwieng.){kind=link}