Guwahati, Nailar 05:Uwei u rangbah la kynnoh ba u la pyndih bih ia la ki jong ki khun rit hashwa ba un dih sa ia lade hapoh ka iingsah ka jong u hapoh ka sor rit Sivasagar ka Assam, ong ka khubor heh pulit.
Kane ka jingjia ka ba la pynkyndit ia ki ba bun balang ka la jia ha kane ka sngi Balang ba la lah, hynrei ka la paw pyrthei tad haduh hynnin ka sngi Palei.
Ia une u rangbah la tip kyrteng kum u Mridul Handique u ba dei na ki bynta jong ka shnong Bogidole ha ki thain ba pajih na ka sor rit Sivsagar.
Katkum ki khubor la iathuh ba hadien ba ki para marjan ki la ioh jingtip halor kane ka jingjia ki la pynkit noh mardor ia u bad ia kine ki arngut ki khun rit jong u shapoh hospital.Hynrei u khun ba dang 6 snem jong u, u Pintu Handique la pynbna da ki doktor ba u la dep khlad noh.U Mridul ruh u la khlad noh hapoh ka hospital.
Na ka liang u Superintendent of Police ka Sivsagar district, u Subhrajyoti Borah u la ong ba uwei pat u khun ba 10 snem jong u Handique u la don hapdeng ka jingshitom ka ba jur bad u dang don mynta hapdeng ka jingshah sumar hapoh Assam Medical College Hospital (AMCH) ha Dibrugarh. “Na ka liang ki doktor ki kyrmen ba un ioh lait im,” ong u Borah.
Ha ka jingtohkit na ka liang ki bor pulit ki la shem ba une u briew u la iakynduh jingeh ha ka ba iadei bad ki kam iing kam sem bad ka kurim jong u.Kane ka kurim jong u bad ki khun kynthei ki shong ki sah la ka jong mynta lah kumba katto katne bnai, bad na ka liang ki pulit ki suba ba ka jingiakynad halor ka kam iing ka la lam sha kane ka jingjia ka ba sngewsih.
