Shillong, Risaw 13: U Lamphang ka ïingdorbar thawaiñ ka Jylla u Thomas A Sangma ha ka sngi Baar ula ong, ba ka jingleit pyniasoh ki 8 ngut ki MLA ka UDP sha ka BJP ka dei kaba dang khmih bniah bad shen yn sa ai ia ka rai.
“Nga dang khmih bniah bha, kumta ngan ym ong ki MLA ka BJP. Ka jingleit pyniasoh kadei kaba dang don hapoh jong ka jingkhmih bniah bad nga dang ap ia ka jingpynsngew na ka liang kiba iadei bad ka aiñ ka kanun” ong u Sangma haba iakren bad ki nongthoh khubor.
Ula ong ba ki 8 ngut ki MLA kila pyntip ia u bad ula pyntip kylla ia ki, ba u dang donkam shuh shuh ia ka por.
“Kila wan ban iakynduh ia nga. Nga lah batai ia ki ba kane ka mat kadei kaba dang don hapoh ka jingkhmih bniah bad nga dang donkam shuh shuh ia ka por” ula ong.
U Lamphang ula ong, ba u dang ap ia ka jingpynbeit ia ki jingujor na ka United Democratic Party.
“Kala don ka jingujor na u Bah Metbah Lyngdoh bad ka UDP. Ka jingujor ka long kaba rit kaba don pat ia ki jingduna, kumta nga lah ai por 10 sngi ba un pynbeit ia kane. Ka por jong ki kan kut noh lashai ka sngi. Nga dang ap ia katei bad ia ki jingpynsngew na kiba shemphang ia ka aiñ ka kanun na ki tyllong ki bapher bapher” ula ong.
Haba iada ia ka jingpynslem, u Sangma ula ong, “Ka ophis jong u Lamphang kam lah ban shu rai beit noh kumto. Nga hap ban long uba phikir, ban ia kaba leh ia kaei kaei kaba bakla. Nga lah dep ban ai ia ka rai ha ka por ba la phiah ia ka seng Congress ruh. Wat ka Parliament kam shim la lah ban ai ia kano kano ka rai haduh mynta. Ngam shim la pynslem khnang ia kane, nga dang shim ia ka por khnang ba nga lah ban ai ia ka rai da ka jingmut jingpyrkhat kaba shai kdar”.
Halor ki jingduna jong ka jingujor ka seng UDP, ula ong, “Katkum ki jingpynsngew na kiba tip bhai a ki aiñ ki kanun kila don ki jingduna khyndiat, ka jingaiti ka jongki kam shim la long kaba shai kdar bha”.
Haba pynshai ia ka kamram ka jongu, u Sangma ula ong, “Kum u Speaker ngam lah ban ai jingithuh ia ka jingpyniasoh namar kadei ka kam kaba leh da ka Election Commission of India. Nga dang khmih bniah ia ka jingphiah ia ka seng”.
Ula bynrap ba ha ki jingjia kiba lah dep, kynthup ia ka Congress sha ka jingpyniasoh sha ka TMC bad ha ka jingshim rai ka jongu kham mynshwa kadei kaba dang don hapoh ka jingtian bishar jong ka iingbishar, kadei ruh kaba dang shah khmih bniah.
“Kaba nyngkong eh kadei ban rai ia ka jingujor jong ka UDP katkum ka jinglong jingman kaba lah dep ban jia. Nga nga khmih ia ka jingujor ha kaban mait kyrteng” ula ong.
Haba kylli, la ki 8 ngut ki MLA yn khot kumno haba ka jingshim rai kadei kaba dang sahteng, u Sangma ula ong, “Kane kadei ka jingkylli, kaba nga ruh nga kylli ialade hi. Ka long kaei kaei kaba hap ban peit ia kaei ka rai kaba nga ngan shim”.
