Nongpoh, Risaw 13 : Ki Pulit ka Byrnihat ha ryngkat ka kynhun SDRF, kila ioh ban sei ia ka met jong u samla uba ngam jyllop ha Wah Umtru, Byrnihat ha ka 10 tarik Risaw.
Ia ka met une u samla lah ioh ban khwai ha ka 12 tarik Risaw hadien 2 sngi ba ula jah ha katei ka wah.
Une u samla u kyrteng u Bishnu Ghosh, 19 snem ka rta, uba dei u khun jong u Ratan Ghosh, bad uba shong ba sah ha Saraibahi, Morigaon, Assam.
Hadien ba la sei ïa ka met, ki pulit ki la pynlong ïa ka jingtohkit ban lap ïa ka daw jong ka jingïap jong une u samla.
Katkum ka jingtohkit, la lap ba ka met ka la sdang ban pyut, hynrei ym shym la lap ïa kino kino ki dak kiba pynmih jingsuba ba don ka jingshah pynïap ne kano kano ka kam sniew.
Ki bahaïing hasem jong u samla ki la leit ban peit ïa ka met bad ki la pynpaw ba kim don kano kano ka jingsuba sniew halor ka jingïap jong u. Ki la pynskhem ba katkum ka jingsngew jong ki, ka jingïap jong u ka dei na ka jingngam jyllop ha katei ka wah.
