Shillong, Risaw 13 : U Myntri Rangbah Conrad K Sangma ha ka sngi Ba-ar ula ong ba ka jingdawa ban weng ia u Amit Kumar kum u Advocate General ka dei ka kam ka bym lah ban shu rai shimiet shimiet namar ka Ain ka dei kawei na ki Tnad kaba pyniaid ia ki kam ka Sorkar.
“Nga burom ia ka jingsngewkhia jong ki nongiasaid ain. Ki don ki kam ba ki iatakhuh bad u AG, Ngam kwah ban kynthoh eiei namar ka dei bad u shimet. Nga la pyrshang ban pun pyrnon ban pynjai jai ia ka jinglong jingman” ong u Conrad.
“Ia ka Sorkar, ki Tnad kum ka Fianance, CM Secretariat, Home, Law ki dei kiba kongsan bha. Ki ktah ia man ki tnad treikam. Kam dei kum ka tnad Sports bad Agriculture kaba ki kam ki long tang ha ka 1-2 tylli ki tnad. Kine ki 4-5 tylli ki Tnad ki treikam ha baroh ki kam jong ka synshar khadar” ula ong.
U Conrad ula pynpaw ba baroh ki dei kiba lah ban bujli hynrei ka rai ka donkam ia ka jinghap iapyrkhat.
“Baroh ki dei kiba lah ban bujli, baroh ki dei kiba lah ban kylliang, kam don jingeh ia kata. Hynrei kam dei kaei kaei kaba ngi khmih mynta bad leh noh lashai tang namar ba don ba dawa mano re mano. Ki kam kim iaid kumne. Nga la batai ia kiei kiba long ba man hapoh namar ki briew ki hap bna tip ba kam dei kaba suk ban shim ia ka rai kaba eh kum kane” ula ong.
U iathuh ba ka Sorkar kala dep ban ai pynthikna ba u AG un kiar na ka jingleit mihkhmat haba ym donkam ia u.
“Ngin sa peit kumno ngin pynbeit ia kane ka kam. Nga kyrpad ia ki nongsaid ain, ki dkhot ka Bar ba kin peit ia ka jinglong jingman ba kham heh. Ngi ngeit ba dei tang ka jingiakren, jingiasyllok ban gin lah ban wanrah ia ki jingpynbeit ba shisha” ula ong.
Halor ka jingiajan bad ka longiing u CM, ula ong “Nga la ithuh ia u la slem bha. Hangta ka jingshaniah ka wan, haba nga tip ia u briew ba um don ia ka jingthmu kaba sniew”.
“Ha u 2008 ha ka por ba ngi thaw ia ka Sorkar, u (L) PA Sangma ula tyrwa ia ka kyrteng u Amit Kumar kum u AG sha u (L) Dr Donkupar Roy, uba long Myntri Rangbah ha katei ka por. Ula don da uwei pat u briew bad ula iaid shakhmat bad kata” ula pynkynmaw.
“Kam pher haduh katno ka jingiajam nga don bad no bad no, kata kam lah ban pynthikna ba un bteng ha ka kam. Phi trei na ka bynta ka rukom treikam jong ka sorkar. Phi lah ban kylli ïa kino kino ki Chief Secretary barim, ki ophisar kiba la shongthait ne ki Myntri Sorkar la u la shah thung tang namar ba nga ithuh bha ïa u, ne namar ba u trei katkum kaei kaba ka sorkar ka kwah,” u la ong.
“Ngam len ba nga ithuh ïa u, hynrei kata ka jingïithuh ka pynkhlaiñ ïa ka jingshaniah jong nga ba u trei na ka bynta ka jingmyntoi jong ka jylla,” u la bynrap.
Haba ïadei bad ka jingtbit jong u AG ban trei ïa la ka kam, u Sangma u la kyntu ïa ki paidbah ban ïakren bad ki ophisar sorkar bad ki Myntri sorkar, kiba lah ban ai jingtip kaba kham bniah halor ka jingtreikam jong u.
“Nga sngewthuh bad burom ïa ki jingsngew jong ka kynhun ki lawyer, hynrei u ngeit ba ka jingïakren ka dei ka lad kaba lah ban pynbeit bad ngan sngewkmen ban ïarap ban pynïaid ïa katei ka jingïakren” ula ong
