SHILLONG, Naiwieng 13: Ka Dorbar shnong Wahingdoh haka 12 tarik mynta u bnai kala pynkuburom ia 4 ngut ki nongdro bad ki nongpynwandur ia ki kynroh ka thain kiba kynthup u samla Kaspar Syiem, u Seibor Iawphñiaw, u Jef Lyngdoh bad u samla Kyrmen Shabong.
Lah ban kdew ba ka Dorbar Shnong Wahingdoh kala ioh iaka nam jingjop ha kaba iadei bad ka jingiakop pynwandur ia ka dong ka thain lane ka ‘Best Artwork Locality’ ia ka ba la tip kum ka Beautification bad Enhancement Competition bala pynlong daka tnad Tourism ka sorkar jylla kum shibynta ban rakhe iaka jingdap 50 snem jong ka jingioh iaka jylla kaba pura.
Ka sorkar jylla lyngba ka tnad Tourism kala ai iaka khusnam daka song pisa iaka Dorbar Shnong Wahingdoh haduh T. 50 hajar tyngka halor ka jingitynnad haka rukom dro hapoh ka shnong ka thaw.
Haba kren ha kane ka sngi u Rangbah ka Wahingdoh u bah Baburon Marbañiang hadien ba u la batai iaka jingmut jongki jingdro baroh haki kynroh ula ai khublei ruh iaka ophis Deputy Commissioner (DC) East Khasi Hills District kaba la pynshlur iaka shnong ban pynphuh bad pynphieng iaki shnong ki thaw kum shibynta ka jingrakhe iaka jingdap 50 snem ka jylla.
“Ka long ka jingsngew sarong iaka shnong kaba laioh iaka nam jop bad ka jingpynitynnad iaki paidbah nongleit nongwan kiba iaid lynti bad kiba iohi ia kane ka jingdro khamtam ruh kawei kadei ba ngin leh khuid khnang ban kan kham itynnad shuh shuh iaka shnong” la ong u bah Baburon.
U bah Baburon u la ong ba ki samla ki donkam shibun iaka jinghikai kaba biang naka bynta kasap kaphong kaba ki kidon haka jingdro dur ban pyntbit shuh shuh iaka sap jongki.
