Shillong, Lber 08: Kum shi bynta ban rakhe iaka sngi burom ia ki kynthei lane ka ‘International Women’s Day’, ka seng National Domestic Workers’ Movement (NWDM) haka jingiatreilang bad ka Meghalaya Aids Control Society (MACS), hynne ka sngi kala pynkupburom iaki kynthei kiba dei ruh ki nongbylla ïing briew.
Nalor ka jingpynkupburom, ka NWDM bad ka MACS kala ai jinghikai ruh iaki kynthei halor ka koit ka khiah bad halor ka jinglong shngain haka por trei naka bynta ka bha ka miat jong ki baroh.
Ha kane ka sngi naka liang ki nongmihkhmat jong ka MACS kila ai jinghikai ruh iaki samla bad longkmie halor ka jingpang HIV AIDS bad kumno ban sumar haba iadei bad une u khniang jingpang ban lait na kane ka jingpang.
Ia kane ka jingrakhe la pynlong hapoh ka Savio Hall Laitumkhrah ha kaba da ki spah ngut ki samla kynthei bad ki longkmie kila wan ban shim bynta.
Ki kongsan kiba wan shim bynta ki kynthup Dr. Judita Syiemlieh bad ka kong Bakodor Kharwanlang kaba dei ka Vice President jong ka All Meghalaya Domestic Workers Union.
Nalor ka jingshah hikai halor ka hok ki nongtrei bylla sngi bad halor ka jingpang HIC AIDS, ha kane ka sngi la sakhi ruh ka jingiashim bynta ki riew kynthei ha ka shad, ka rwai tynrai jong ka jylla Meghalaya bad ka shad tynra jong ki jaidbynriew Bodo.
