Rakhe ka Kjat Sngi Jingkyrmen CLF ïaka sngi ki longkmie ha Umran
Nongpoh, Lber 08: Ka Kjat Sngi Jingkyrmen CLF ka ba kdup ïaki VO ba hap ha Myrdon Nongbah hynne ka sngi Balang, kala rakhe ïaka sngi ki Kynthei haka jingïalang kaba shongkun kaba la long ha Umran Ñiangbyrnai.
Ha katei ka sngi ka kong Macdalyne S Mawlong MDC ka Umsning kala shimbynta kum ka kongsan haka jingdonlang ka kong Violet Mawlong President Ka Kjat sngi Jingkyrmen, u Tamzalian Tomging District Mission Manager ka NABARD, Bah S Kharbani Rangbah Shnong, ki longkmie naki Village Organization bapher bapher lem bad ki nongtrei jong ka Umsning C&RD Block.
La pynphuh pynphieng ruh ha katei ka sngi da ki jingrwai bad jingshad, ki skit bala shim bynta da ki longkmie kum ka jinglehkmen ïa katei ka sngi ba kyrpang jong ki longkmie.
Haba kren ha katei sngi naka liang ka Kong Macdalyne S Mawlong kala pynpaw ka jingsngewkmen ban iadon bynta ha kane ka sngi bad ai khublei ruh ïa baroh ki para longkmie kiba don ka jingkitkhlieh kaba khraw naduh iing haduh bar ban pynbiang ïaki jingdonkam bad wat haka imlang ka sahlang.
“Kum ki longkmie ka kamram kam dei ba ngin kut tang haki saw kynroh jong ka ïing shet ja hynrei sngew sarong ba ha kane ka juk ba mynta ki longkmie ki mih shakhmat ha baroh ki liang ban kit ban bah, ban shakri ïaka imlang ka sahlang bad ka jaitbynriew, kumba la pynkup bor haki” la ong ka kong Macdalyne.
Kala ong ruh ba haka jingshakri jong ka kum ka MDC kala lah ban ai mynsiem ïaki para longkmie jong ki Village Organisation bapher bapher ba kin mih shakhmat.
