Shillong, Lber 08 : U MLA ka NPP na North Tura Thomas Sangma, ula pynkhreh ban shimti ia ka shuki Lamphang ka Iingdorbar Thaw Ain ka Jylla lashai ka sngi palei da kaba jop suk namar ka jingbym don ki nongialeh pyrshah na ka kynhun Liang Pyrshah.
U Thomas ula thep kyrteng kum u kyrtong sha ka elekshon ha ka sngi ba-ar.
Ia ka kyrteng jong u a tyrwa da I Kong Ampareen Lyngdoh bad u Marthon Sangma na ka NPP bad u Bah Paul Lyngdoh bad Bah Mayralborn Syiem na ka UDP.
“Namar ka jingbym don kiwei pat kiba thep kyrteng kum ki kyrtong, u Thomas un shah jied pura kum u Lamphang ha ka 9 tarik mynta u bnai ha ka Dorbar Kyrpang jong ka Iingdorbar” pyntip u Commissioner Secretary ka Assembly Bah Andrew Simon haba iakren bad ki nongthoh khubor.
Kane kala wan jia hadien ba ka Liang Pyrshah kala rai ban nym pynieng kyrtong sha ka elekshon jong ka shuki Lamphang ka Iingdorbar.
Ka Sorkar MDA-2 kala ioh ia ka jingkyrshan jong 45 ngut ki MLA ha kaba 26 ngut ki dei na ka NPP, 11 UDP, 2 BJP, 2 HSPDP, 2 PDF bad 2 Independent ne MLA shimet.
Ka Liang Pyrshah ka don tang 14 ngut ki MLA ba kynthup ia 5 ngut ka Congress, 5 ngut na ka All India Trinamool Congress bad 4 ngut na ka Voice of the People Party.
