Shillong, Jylliew 08: Ka Meghalaya Legislative Assembly kala shah pynkupburom haka Ministry of Parliamentary Affairs hadien baka la lah ban pyntreikam iaka National eVidhan Application (NeVA).
Kumban shu pynkynmaw ba ka Meghalaya Assembly kadei ka jylla ba Khyndai hapoh ka ri India bala pyntreikam iaka NeVA.
Iaka jingpynkupburom shaka Meghalaya Assembly, la aiti da u myntri khynnah badei khmih iaka Parliamentary Affairs ka sorkar pdeng u Arjun Ram Meghwal haka jingialang jong ka National Workshop halor ka NeVA kaba la long ha Convention Hall Ashok ha nongbah Delhi haka 25 tarik Jymmang.
Ia kane ka khusnam la shimti da u bah Dapborlang Marwein, Computer Programmer bad Nodal Officer (NEVA), Meghalaya Legislative Assembly haka jingdon lang ka kong Lawanda Lyndem, Deputy Secretary, Parliamentary Affairs Department ka sorkar Meghalaya bad Nodal Officer, NeVA.
Haba iadei bad kane u myntri rangbah ka jylla u Conrad K. Sangma, ki symbud myntri rangbah ka jylla kata u bah Prestone Tynsong bad u bah Sniawbhalang Dhar kila ai khublei iaka kynhun NeVA bad IT Cell jong ka Meghalaya Assembly halor ka jinglah ban pyntreikam sted iaka NeVA.
Naka liang u Commissioner and Secretary ka Meghalaya Legislative Assembly u Dr. Andrew Simons ruh ula ai khublei iaka tnat Ministry of Parliamentary Affairs ka sorkar pdeng halor ka jingithuh iaka jinglah ka sorkar jylla bad ka Meghalaya Legislative Assembly Secretariat ban pyntreikam iaka NeVA.
“Ki dkhot ka Meghalaya Legislative Assembly bad ka NeVA kila iarap bha bad nga kyrmen bad ngin lah ban pyntreikam bha shuh shuh iaka NeVA naka bynta ban pynduna iaka jingpyndonkam daki kot” la ong u Dr. Andrew.
Haba kren haka sngi pyntreikam iaka NeVA u Dr. Andrew ula iathuh bala pyntreikam iaka State Project Monitoring Unit (SPMU) cum NeVA haka 27 tarik Lber 2020 haka jingkhmih da u Chief Secretary iaka Committee pyntreikam.
Iaka jingiasoi MoU la leh haka 30 tarik Lber 2020 hapdeng ka Ministry of Parliamentary Affairs, New Delhi, ka sorkar Meghalaya bad ka Meghalaya Legislative Assembly bad ka House Committee naka bynta ban pyntreikam daka e-governance.
Iaka DPR la ioh jingmynjur lyngba ka State project Monitoring Unit haka 21 tarik Nailur 2020 bad iaka NeVA la pyntreikam naduh 18 tarik Lber 2021.
U Commissioner and Secretary ula iathuh ba ia kane ka Projek la bei pisa daka sorkar pdeng bad ka jingpynlut ban pyntreikam ka long haka Ratio of 90:10.
