Shillong, Risaw 23 : Ka Bharatiya Janara Party (BJP) North Shillong Mandal, hynnin ka sngi saitjain, kala pynkup burom ia ki rang iapyni dohksah kiba la jop bad wanrah nam na ki lympung ka Pyrthei bad ha ka Ri India.
Kine ki arngut ki dei u Bah Donbor Rumnong uba ioh ia ka kyrdan ba lai ha ka jingiakop Mr Physique jong ka WFF Pro AM Championship ba long ha Vietnam bad u Shuvam Roy uba ioh ia ka kyrdan ba san ha ka Elite Classic Nationals 2022 ba long ha New Delhi.
Ia kane ka jingialang pynkup burom la pynlong ha ka Ophis ba dang shu plie jong ka 17 th North Shillong BJP ha BAMENA HOUSE kaba don ha Riatsamthiah .
Haba kren ha ka jingialang, u Bah M Kharkrang, heh Pulit IPS bala shongthait bad nongaiktien ka BJP, ula ban jur halor ka jingdonkam ban don noh ia ka Sports Policy ha Jylla haba ong ba da ka jingbym don kane ka Policy kala khanglad ia ki samla ba don ka sap ban poi sha ki kyrdan ba shajrong.
