Shillong, Risaw 23 : Ka Khasi Students’ Union (KSU)-Nongtyngur Unit kala leit ban maramot bad pynwan dur biang ia ka Jingkieng Diengjri kaba don ha syndah ka Shnong Nongtyngur ban lah pynneh ia ki matti jong ki Longshuwa Manshuwa, kaba lah ban wanrah ia shibun ki jingmyntoi bad jingpynitynnad ia ka Shnong.
Ki Nongialam ka KSU ryngkat ki Dkhot bad ruh ki riew rangbah jong ka Shnong, kila iamih paidbah hynnin ka sngi saitjain ban bteng biang ia ka jingmaramot bad pynwandur bha ia kane ka jingdieng Diengjri ba kan khlain bad ba kan neh slem.
Hashuwa ba ka KSU kan shimti ban maramot ia ka jingkieng Diengjri ha ka thain, kiba bun ki briew kila leit ban pom dusmon bad bret pathar ia ki jaboh jabain ha ka jaka riat ba don kane ka jingkieng hynrei naduh ba shimti ka KSU, kane ka jingleh dusmon kala sangeh.
U General Secretary ka KSU Nongtyngur Unit samla Malajied Khongbuh, ula ai khublei ia ka jingiatreilang jong ki Nongshongshnong haba kyrmen skhem ba baroh ki jingthmu jong ka Seng kin long kiba jop da kane ka jingiatrei ryngkat ryngkat.
Ki Jingkieng Diengjri ba don ha Ri-lum Khasi ki dei kiba la paw nam bha ha satlak ka pyrthei bad ki pyni ruh ia ka jingstad jong ki Khun Khasi Khara ban pyndonkam ia ka mei mariang ha kaban pynsuk ia ka leit ka wan u khun bynriew khlem da pynjot ia ka mariang.
“Ki jingkieng jri ki dei shisha ki matti jong ki Longshuwa jongngi kiba dang sahnam haduh kine ki sngi. Ki Jingkieng Diengjri kiba kham pawnam hapoh ka Bri u Hynniewtrep ki dei ka Jingkieng Jri ha Nongriat, Mawlynnong-Nohwet, Kudengrim, Mawkyrnot bad kiwei kiwei” ula ong.
“Kine ki dei ki dak ki shin kiba pynpaw shai kdar ba u Khasi hyndai u dei u jaidbynriew uba iohi jngai bad pyrkhat maian bha ia ka imlang sahlang, ka mei mariang bad khamtam ia ka lawei ki longdieng ban sa wan. Lada kum ka Jaidbynriew ngi iai buddien ban pynjanai ia ki dienjat ki longshuwa, khlem pep ka jaidbynriew kan sa long kaba laitluid na ki jingjot kiba ap ha ka imlang sahlang bad ka ri ka Jaidbynriew jong ngi” ula bynrap.
