Shillong Nailar 04: U Myntri ka pule puthi u Rakkam A Sangma ula pynbna ba ka State University kala pynkhreh ban sdang noh ia ka jingshim klas bad ka jingpynrung klas ia ki samla pule kala iaid shakhmat.
Haba iakren bad ki nongpathai khubor hynne ka sngi nyngkong, u Rakkam Sangma ula pyntip ba ka Skulbah kala iohpdiang ia bun tylli ki aplikeshon na ka bynta ki jingpule ha ki Course ki bapher bapher ha Shillong bad Tura.
“Kumta ka state university kala long kaba la pynkhreh ban sdang noh ia ka jingshim klas” ula ong.
U Myntri ula pynshai ba ki college ki bym pat pyniasoh ne affiliate bad ka North Eastern Hill University (NEHU) ha ki snem kiba la dep, kumta mynta kin sa pyniasoh bad ka State University. Kane kan kynthup ia ki People’s Colleges bad ki College kiba ioh ia ka Grant-in-aid.
“Katba kiwei pat ki college sorkar bad kiwei kiwei namar ba kala don ka ‘Technical Issue’ bad ka NEHU, kumta kin don katto katne kiban pyniasoh bad (ka state university) naduh ka samoi pule kaban wan” ula ong.
U Myntri ula pyntip shuh shuh ba ka state university kala dep ban pynbna ia ka admission na ka bynta ki 4 tylli ki shnad pule – English, Commerce, Khasi bad Social Work ha ka Shillong Campus.
Na ka bynta ki klas kiba shipor, ka university kan pyndonkam ia ki katto katne ki kamra ha ka jaka pule jong ka Shillong Engineering College.
U Rakkam Sangma ula ong, ba ka sorkar jylla ka dang trei ban seng ia ka jaka pule kaba shipor ne ka Temporary Campus ia ka university. Hynrei ia ka kam kaba iadei bad ka Bijini Complex ka dang sahteng hapoh ka iingkashari bad ka sorkar ka dang ap ban ioh ia ka rai kaba khatduh.
