Shillong, Nailur 07: Ka sorkar jylla ka la pynkhreh mynta ban pyntreikam noh da ka Application ne ka Apps, ka ban tehsong lang ia baroh ki Self Help Groups kiba don ha ka jylla kiba la kot mynta sha ka 42000 tylli ei ei khnang ban pynsuk ha ka rukom treikam ha ki liang baroh.
Ia kane la pynbna da u Myntri Rangbah ka jylla haba kren kum u Kongsan ha ka SHG Mela kaba long hynne ka sngi ha madan Mawryngkneng.
“Mynta ka sorkar ka phaikhmat bha sha ki SHG ban pynkylla ia ki kum ki Cooperative Society khnang ba yn dup lah ban ai jingiarap shuh shuh khambun. Ka jingdon ki SHG ka iarap ruh ia ka imlang sahlang bad ka pyntyllun stet ia ka kam namar jan man ka longiing don beit iwei i dkhot ha ka. Da kane ka sienjam ngin lah ruh ban rung sha man ki long iing la ka long ban pyntreikam ha ka koit ka khiah, ka pule puthi bad ruh ha kaba iadei bad ka mariang kumjuh,” u la ong.
U Myntri Rangbah u la pynpaw ruh ba ka jingdon ki SHG ka la nang pynkupbor shuh shuh ia ki longkmie ban mih shakhmat bad kyrshan para ma ki ha ki rukom treikam bapher bapher khamtam eh ha ki nongkyndong.
“Kane kadei ka jingjop kaba kiwei pat ki jylla ha ka Ri kim pat kot bor satia,”u ong da kaba ai nam ia ki ophisar kumjuh ia ki longkmie kiba la trei ryngkat ryngkat haduh mynta.
U Myntri Rangbah u la iathuh ruh ba shwa u 2018 ki don tang kumba 4000 tam ki SHG hynrei mynta pat ka la kiew da ki phew shah bad jan kot sha ka 45000 tylli.
Kum ka jingkyrshan ia ki SHG baroh, u Myntri Rangbah ha kane ka sngi u la sam ruh ia ka song pisa kaba 1 klur tyngka naka bynta ka Mawryngkneng Block. Ki la donruh haduh san tylli ki village organisation kiba ioh ia ka song kyrshan pisa kaba kot sha ka 43 lak tyngka.
Lyngba katei ka Community Investment Fund, ki SHG lane ki VO kin lah ban sdang sa ia ki kam kiba lah pat ban pynmih kamai ne ai jingmyntoi ia ka kynhun. Ha katei kajuh ka sngi, la mang ruh haduh san lak tyngka kum k aram na ka bynta ki 5 tylli ki SHG kiba dei na katei ka Block.
Ha katei ka jingialang da ki hajar ngut ki dkhot jong ki SHG kiba dei na ka Mawryngkneng Block ki la wan ban shim bynta bad pyni ruh ia ki kam ba ki trei ha ki dukan ba la buh kyrpang ha katei ka sngi.
Na ka liang u Bah Prestone pat u la ong ba ha kane ka jaidbynriew ai jait kmie kano kano ka kam kaba peit da ki kynthei ka long bniah bha. “Ha ki sorkar ba la dep kam pat ju don ka jingmang pisa kaba haduh katne kyrpang na ka bynta ki longkmie kumba leh kane ka sorkar mynta,” u la ong.
Shuh shuh u la pynbna ruh ba ia katei ka skim ban kyrshan bad aibor shuh shuh ia ki longkmie kin nang pynkhlain shuh shuh wat ha u 2023 ruh.
Ha kane ka sngi la ioh ruh ia ka jingkren na u MLA ka Mawryngkneng, Bah Pyniaid Syiem kumjuh na u Sordar jong ka Mawryngkneng Bah Peter Lawai nalor kiwei kiwei.
