Shillong, Nailur 07: Ka Sorkar Jylla lyngba ka Tnad Pule Puthi hynne ka sngi Balang, kala thung ia ka kynhun ba 4 ngut ki dkhot jong ka Enquiry Committee ka ban tohkit ia ki kynrum kynram kiba mih hapoh ka skul Pine Mount.
Kane ka Enquiry Committee ka dei kaba la khlieh da u Bah R Rapthap, IAS uba dei u Secretary ka Tnad Pule Puthi ka Jylla, ong ka kywroh bala pyllait da u DR BDR Tiwari, Commissioner & Secretary ka Tnad Pule Puthi.
Une u Heh Ophisar u pyntip ba ia kane ka Enquiry Committee la thung naduh ka 1 tarik Nailur, ka ban tohkit ia ki jingujor kiba bun jait bad ki jingud jingnam jong ki Nonghikai ka skul Pine Mount haba bthah ruh ia ka Committee ba ka dei ban aiti kham kloi katba lah ia ka kaiphod jingshem.
Lah ban kdew hangne ba ki Nonghikai ka skul Pine Mount kila pynlong ia ka jingiakhih da kaba deng lama iong ban pyrshah jur ia ka rukom treikam jong ka Principal Kong Aiom Ksiar Diengdoh. Ki Nonghikai kila dawa ia ka Kong Aiom ba ka dei ban hiar noh na ka shuki Principal.
Na ka liang jong ki Kmie Kpa ruh kila ai ka jingkyrshan ba pura ia ka jingdawa jong ki Nonghikai haba sei madan ruh ia shibun ki jingduna jong kane ka skul naduh ba shimti ban pyniaid I Kong Aiom, kaba la buh ia ki Khynnah skul ban iakynduh ia shibun ki jingeh.
Une u Heh Ophisar ula kyntu ia ki Nonghikai ka skul ba kin kiar na ka jingpynlong ia kano kano ka jingiakhih namar ka Sorkar kala dep shim ia ka sienjam kaba dei ban leh ha kaban pynbeit ryntih ia ka jingshakri jong kane ka skul.
