Shillong, Jylliew 12: Ka sorkar jylla shen kan sa pynmih ia ka jingpynbna ban thung ia ka Advisory Board na ka bynta ban pyntreikam iaki kyndon jong ka Prevention of Illicit Traffic in Narcotic Drugs and Psychotropic Substances, (PIT NDPS) Act 1988 ha ka jylla.
Ia katei la pynbna da u Myntri ka Tnad Social Welfare Bah Paul Lyngdoh hynne ka sngi nyngkong hadien bala wai ka jingialang bad ki heh pulit, ki heh ophisar ka jylla bad ki nongialam na ki kynhun bapher bapher, kaba iatai halor ka jingjyllei u Drug ha ka jylla.
“U Nongbishar ba la shongthait jong ka iingkashari u Shivaji Pandey, uba long ruh u Chairman jongka State Consumer Council, ula ai iaka jingmynjur da ka jingthoh ban long u Chairman jongka Advisory Board bad kane kala plie lynti ia ngi ban pyntreikam noh ia kane ka aiñ” ong u Bah Paul Lyngdoh haba iakren bad ki nongthoh khubor.
Ula iathuh ba ki kam kiba iadei bad u Drug la rejistar case hapoh ka Narcotic Drugs and Psychotropic Substances (NDPS) Act 1985, hynrei kila don pat katto katne ki jingdkoh khamtam haba ka Section 64 A jong katei ka aiñ kaba ailad ia ki nongpyndonkam ia u Drug ban lait na ki jingshah pynshitom ha ka aiñ.
U Bah Paul Lyngdoh ula ong, watla kila don ki ain kiba pyrkhing kum ka PIT NDPS Act 1988, hynrei ym shim la lah ban pyntreikam ha ka jylla namar ka jingby mdon iaka Advisory Board.
“Mynta haba u nongbishar bala shongthait ula mynjur ban long u Chairman, kumta ka sienjam kaba ngin shim ka long ban pynskhem noh iaka advisory board bad ki nongdie drug kin shah pynngat noh haka PIT NDPS Act ha kaba yn pynskhem ia ka jingkem ia ki bad ban pynthikna ba kim dei ban ioh jamin ha ki 3 bnai” ong u Bah Paul.
“Hapoh katei ka aiñ ki briew kiba don ia ki dak sniew ba kidei ki nongdie drug, la kidei kiba rit, pdeng ne heh ki lah ban shah pynngat ha katei ka aiñ bad kin shah set hapoh phatok naka bynta 3 bnai ia kaba lah ruh ban pynjlan shaduh shi snem” ong u Myntri Sorkar.
Ula iathuh ba ka jingialang kala iatai sani halor ka jingdonkam ban pynkhlain iaka Narcotic Cell kaba don mynta tang 3 ngut ki pulit ophisar bad kumta yn sat hung bun noh ia ki ophisar ha katei ka tnad khnang ba kin lah ban shakri ha baroh ki District jong ka jylla ban lah ban tehlakam ia ka jingpyniaid iew ia u Drug haka jylla.
Ha kaba iadei bad ka jingioh kurup bun ia u Drugs na Lumshnong, East Jaintia Hills District ha ka 11 tarik mynta u bnai bad halor ka jinglylli balei ka tnad Custom bad ki Pulit kila pheil ban khmih bniah ban lap ia une u jingdih pynbuaid na ka Entry Point, u Bah Paul ula kubur ba ka don ka jingduna na ka liang ki bor ba dei khmih hynrei ka sorkar kan pyrshang ban lap ia kine ki jingdkoh haba ki mih hangno hangno ruh bad ula ong ba ka jingioh ban kurup bun bah u Drug ka pyni ruh ba ki bor Sorkar kim shym la iohthiah bad utei u jingdih uba bun bha ula dei ban poi sha kylleng ki bynta jong ka jylla Meghalaya ne wat shabar ka jylla ruh kumjuh.
 Act 1988 ha ka jylla.){kind=link}