Shillong, Iaiong 19: U Symbud Myntri Rangbah ka jylla u Bah Sniawbhalang Dhar uba long ruh u Myntri Kam Pynroi Sor, ula pyntip ba ka sorkar jylla kan sa khot aplikeshon biang na ka bynta ban ioh iaka jaka theh niut jong ka nongbah Jowai.
“Ha ki khyndiat bnai kiba la dep, ngi la khot iaka Expression of Interest (EOI) ha kaba kila don kiba la tyrwa ia ki jaka ki jong ki hynrei kitei ki jaka kim long kiba biang, kumta ngi hap ban khot biang ia ka EOI kaba thymmai na ka bynta kito kiba don iaka jingthmu ban ai jaka iaka sorkar” ong u Bah Sniawbhalang haba iakren bad ki nongthoh khubor hynne ka sngi Balang
Ula pynshai ba ka sorkar kala dep ban pynkhreh nadong shadong haba iadei bad ki jaka bala phah applikeshon hynrei ha ba leit jurip ia ki jaka la shem ba kitei ki jaka kim long kiba bit ba biang.
U Myntri Sorkar ym shim la treh pat ban iathuh eiei halor jaka kaba pyndonkam mynta ha kaban theh ia ki niut bala lum na sor Jowai bad ula ong ba kadei ka kamram ka jongu kum u nongialam bad kum u Myntri Pynroi Sor ban peit ia kane ka bynta bad ki dang iaid shakhmat ban ioh iaka jaka ban lum nuit bad u sngewthuh shai ba ka long kaba kam kaba eh bad kam dei satia kaba suk.
Ha kaba iadei bad ka jaka lum niut kaba thymmai ha nongbah Shillong, u Bah Sniawbhalang ula ong ba ki kam ki jam mynta kila iaid kumba 80% bad kaba sah ka long sa tang ban pynlong iaka Public Hearing ne ka jingpynsngew paidbah. U pyntip ba un sa lum ia ka jingialang halor kane ka kam ha ka taiew ban wan.
Haba pynpaw ba ka Marten ka dang lah ban treikam sa 3 ne 4 snem, une u Myntri Sorkar ula ong “Hynrei ka sorkar kan ym ap haduh ban da kut noh katei ka por…. kumta kala shim ia ki sienjam ban wad jaka shawei namar kan kham bha shibun lada pynkhreh lypa ia ka kam”.
Haba kylli ba ki paidbah ki long artatien ban ai jaka ban pynlong jaka theh niut namar kila sakhi ia kaei kaba jia ha Marten, u Myntri Sorkar ula ong, “Ki paidbah ki dei ban ai iaka jaka namar ia kum kane ka jait kam donkam ban shim lang iaka jingkitkhlieh na ka bynta ka jingbha jong ka jylla, namar lada mih ki jingpyrshah kiba kumne kumtai, kiban mad ia ka jingeh dei Ma nga bad ma phi hi. Kumta nga kyntu ia baroh kiba don bynta ba kin don ryngkat lang bad ngi lem kumta shaei ngin leit ban bret ia ki niut”.
