Yn wanrah ka NEHU-IKBCC ia ka dictionary Khasi-Hindy-Korea
Shillong, Risaw 24: Na ka bynta kito kiba sngewtynnad ban peit ia ki Korean Drama ne K-Drama bad ki phlim Korea bad (K-pop), ban nang kren ne sngewthuh ia ka ktien Korea bad ka kolshor ha Shillong kan sa urlong noh shen naba ka North Eastern Hill University (NEHU) kan sa wanrah ia ka jingpule ia ka ktien Korea bad ka kolshor naduh u snem pule ban wan, u ban sdang naduh u Naitung 2025.
Kane ka jingmih kadei na ka jingiasoi dang shen ia ka Memorandum of Understanding (MoU) hapdeng ka North Eastern Hill University (NEHU), Shillong bad ka Indo-Korean Business Culture Centre (IKBCC), South Korea ban kyntiew ia ka ktien ka thylliej bad ka kolshor bad ban thaw ia ki lad ki lynti ia ki samla ban iohkam iohjam.
Ha ka wat kaba nyngkong jong ka jingpyntreikam ia ka MoU, ka NEHU bad ka IKBCC kin iatrei halor katei ka projek ban pynkhreh ia ka Dictionary kaban kynthup ia ka ktien Khasi-Hindi-Korean-English ha ka por kaba la buh.
Hadien kane yn sa sdang ia ka Course ha ka Korean language & culture, kaban sdang naduh ka 25 tarik u Naitung.
Ha kajuh ka por, ia ka prokram halor ka Khasi bad Hindi yn sa sdang ha ki jaka pule ha Korea lygba ka Faculty Exchange Programme.
Kane ka kynthup ia ka jingiatreilang ki jaka pule ban kyntiew bad ban plie lad ia ka jingsam jingtip lang, ban thaw ia ki lad ki lynti ia ki samla pule ban ioh ia ka International Internship, Scholarship bad ka lad iohkam iohjam ha India bad South Korea.
Ka Department of Linguistics kadei ka shnad ban sdang ia kitei ki kam ki jam ban ai training bad certification ha ka Korean language & culture ia ki samla pule ka NEHU-Shillong.
Katkum ka jingiatehkular hapdeng ka NEHU bad IKBCC, ka Prof. Streamlet Dkhar, ka Head jongka Department of Khasi, kan dei ka Academic Coordinator bad ka Dr. Saralin A. Lyngdoh, Head jonga Department of Linguistics, kum ka Course Coordinator na ka bynta ban pyniaid shakhmat ia ki kam bad ia ki prokram na ka bynta ban don ia ka jingiatreilang katkum ka jingiatehkular ha ka jingiatreilang hapdeng kitei ki ar kynhun.
U Vice Chancellor ka NEHU u Prof. Shukla, ula ong, “Kane ka jingiatreilang kan pynkhlain ia ka jingiadei hapdeng ka ri India bad Korea bad kan plie lad ia ki samla pule ban tip shaphang ka kolshor jong ka East Asia lyngba ka jingsam jingtip lang ha kaba iadei bad ka kolshor bad ka lad iohkam”.
Ka MoU kan plie lad ruh ia ki nonghikai bad ia ki samla pule ban donbynta ha ka
Kam wad bniah, ki prokram ha ka pule puthi, jingsam mar kylliang ha kaba iadei bad ka kolshor bad ka lad iohkam ha ki kompani ha Korea.
Ia ka MoU la soi da u Col. Omkar Singh na ka bynta jongka NEHU bad u Dr. Zena Chung, u Founder Director jongka Indo-Korean Business Culture Center (IKBCC).
, ban nang kren ne sngewthuh ia ka ktien Korea bad ka kolshor ha Shillong kan sa urlong noh shen naba ka North Eastern Hill University (NEHU) kan sa wanrah ia ka jingpule ia ka ktien Korea bad ka kolshor naduh u snem pule ban wan, u ban sdang naduh u Naitung 2025.){kind=link}