Shillong, Risaw 24: Ka Kong Rephica Becky Pde kaba long ka nongmareh lane ka Ultra Runner bapawkhmat ha ka Ri na ka jylla Meghalaya, mynta ka sngi Palei ka la jop ha ka jingiakob mareh ‘Full Marathon’ kaba 42 km ha Tawang, Arunachal Pradesh.
Ka Kong Rephica kala wan nyngkong ha ka thup jong ki nongmareh napdeng ki kynthei kiba don hapdeng 40 bad 49 snem ka rta bad ia kane ka lympung ka baar jong ka Tawang Marathon ba la pynlong da ka sorkar Arunachal Pradesh bad ki shipai India, kila don kumba 4,000 ngut kiba la ïashim bynta na kylleng.
Ka jingmareh kala long na ka bynta 5 km, 10 km, 21 km bad 42 km.
Ka jingmareh kala sdang na Tawang Stadium ha ka por kumba 5:00 baje mynstep, bad la pynkut biang ha kane ka Stadium. Ka lynti mareh ruh ka long kaba kham jynjar namar ka jinglong ranab ha kiba bun na ki jaka.
Ka Tawang Marathon ka long kawei na ki lympung mareh kaba kham jynjar ha India. Kane ka shnong ka don kumba 10,000 phut ha ka jingkynjang bad namar kata, ka jingdon jong ka lyer Oxygen ka duna, kumta ka jingduna ka lyer Oxygen ka buh jingeh ïa ki paidbah salonsar bad kumjuh ruh ïa ki nongmareh.
Wat hapdeng ka jingkhriat kaba shyrkhei bad ka jinghap slap ba malu mala nalor jong ka jingduna ka lyer Oxygen, kiba bun na kitei ki 4,000 ngut ki nongïashim bynta ki la pyndep ïa ka jingmareh.
Ha kane ka sngi, u Myntri Rangbah ka Arunachal Pradesh, u Pema Khandu, ula wan sakhi ha ka jingdon ryngkat ki heh sorkar bad heh shipai.
Lah ban kdew ba ka Kong Rephica ka la pawkhmat ha kiba bun ki lympung mareh khamtam ki Ultra Marathon kum ka Ladakh Marathon, Khardungla Challenge bad kiba bun kiwei pat.
