Shillong, Nailar 22: Kum shi bynta ban rakhe iaka National Sports Day, ka sorkar jylla kala pynbna ban pynlong ia ki lympung ialehkai ba shitaiew lynter ha kylleng ki jaka ka Jylla ka ban sdang naduh ka 22 haduh 29 tarik mynta u bnai.
Ka phang pdeng jong kane ka taiew ialehkai kadei ‘ka jingialehkai ka aibor ia baroh iaki paidbah’ bad kane ka jingrakhe kadei kaba la pynlong daka Ministry of Youth Affairs and Sports bad ka FitIndia ban pynshlur iaki paidbah ban shim bynta ha ki jingialehkai.
Ka Meghalaya kan pynlong ia shibun ki jingialehkai lyngba ki Sports Associations, ki skul bad ki bor district bad ka sorkar jylla kan pynlong ruh iaka jingialehkai naduh ka Football, Cycling, Walkathons bad Basketball.
Nalor kine ka NYKS bad ka SAI ruh kan pynlong iaki jingialehkai ban pynshlur iaki paidbah ban rakhe iaka National Sports Day.
Haka 26 tarik mynta u bnai yn pynlong iaka “Run for Fitness” kaba 5 km ha Shillong ka ban sdang na Polo Grounds bad kane ka jingiakop mareh kadei naka bynta jong baroh khlem da donkam ban siew iaka bai rung bad kino kino kiba kwah ban shim bynta ki lah ban leit mih shaka ophis jong ka tnat District Sports Officer, East Khasi Hills.
Haka 29 tarik mynta u bnai, kan don ka jingialehkai ha kaba kino kino kiba joit kin ioh khusnam daka song pisa bad haka sngi ba kut kan don ka jingialehkai hapdeng ka kynhun State’s Officers bad ka kynhun MLA ha MFA Ground.
Naka liang u myntri ka tnat ialehkai u bah Shakliar Warjri ula ong ba ka jingialehkai ka wanrah ka jingiatylli hapdeng ki paidbah bad ki shnong ki thaw.
Kino kino kiba kwah ban ban shim bynta ha kane ka jingrakhe National Sports Day lane kiba kwah ban tip kham bniah ki lah ban leit haka https://fitindia.gov.in/national-sports-day-2023 bad ki lah ruh ban Post iaki dur ha social media ha ryngkat bad ki Hash-tags: #Sports4Unity #NationalSportsDay #NationalSportsDayMeghalaya #FitIndia #FitMeghalaya
Pule ruh: Dawa ka HYC ia ka Tnad kam Pohiing ban pyntreikam pura noh ia ki 7 tylli ki Border Outpost
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
