Shillong, Naiwieng 25 : Ka Meghalaya Cricket Association (MDA) kala pynkhreh bha ban pynlong ia ka lympung ialehkai ba nyngkong jong ka BCCI-Level Domestic Crikcet Match ka ban long hapdeng ka Meghalaya bad Karnataka ha ka U-19 Cooch Behar Trophy, ka ban long ha madan MCA ha Polo naduh ka sngi saitjain.
Da ka pitch kaba la pynbna dang shen da u BCCI Chief Curator kum kawei na kiba biang eh ha ka Ri, ka madan MCA kala sakhi ia ka jingpynjanai kaba bun naduh u snem 2019-2020 ba kynthup ia ka jingthung ia ki phlang ba kham pher, ki kamra kylliang jain bad kiwei kiwei
Kane ka jingialehkai ba bun sngi pyrshah ia ka Karnataka kan plie lad ia ki rang ialehkai ba kham khynnah ka Jylla ban ioh shibun ki jinghikai. Kane ka jingialehkai kan sdang naduh ka por 8 :30 baje mynstep ha ka sngi saitjain bad ka MCA kala buh ia ki jaka shong ia ki nongpeitkai kiba kwah ban sakhi ia kane ka jingiakhun.
Kane ka jingialehkai kan iarap ruh ia ka Association ban pynkhreh sa shisien ha kaban pynlong ia ka Ranji Trophy, ha kaba lai tylli ki jingiakhun kin long ha Shillong, ka ban sdang naduh u bnai ban wan.
