Shillong, Nailur 23 : Ka Jylla Meghalaya kala pynkhreh mynta ban pynlong ia ka tamasa kieng lieng kayak bala tip kum ka Megha Kayak Festival kaba 5, ka ban pynkylla ia ka Whitewater Village jong ka Wah Umtrew ha Shnong Umtham, Ri-Bhoi District kum ka ‘Adventure Hotspot’ hapoh ka Ri India.
Kane ka tamasa kan long naduh ka 13 tarik haduh 16 tarik Risaw 2022 bad palat 80 ngut ki rang bad ki thei iakieng lieng kayak na kylleng ki Ri ka Pyrthei bad na India, kin wan ban iashimbynta ha kane ka tamasa bad kan dei ruh ka tamasa kieng lieng kayak kaba heh duh hapoh ka Ri India.
Ka Megha Kayak Festival (MKF) ka dei ka International Whitewater Kayaking Competition ka ban kynthup ia artylli ki jingiakop kieng lieng kayak-ka jingiakieng lieng kayak ba haduh 350 meter bad ka jingiakop kieng ia ki lieng kayak ha ki jaka turthup ha kaba saw ngut ki nongiakieng lieng kayak kin iakop lieng katba sted tam. Kane ka jingiakop kieng lieng kayak ha ki turthup ka dei kaba dang ioh jingithuh dang shen da ka International Canoe Federation (ICF) kum ka jingialehkai Olympics ka ban sa sdang ha ka sien ba nyngkong eh ha ka Olympics Games 2024.
La pyntip ba ha kane ka tamasa, ki rang bad ki thei iakieng lieng kayak ba pawnam ka pyrthei kiba la pynthikna ia ka jingwan iashimbynta ki kynthup ia kiba la ialehkai ha ki Olympics kum u Giovanni De Gennaro (Italy), Sofia Reinoso (Mexico), Vavra Hradilek (Czech Republic), Extreme kayaking world champions Nouria Newman (France) bad Adrian Mattern (Germany). Nalor kine, kin don ruh kiwei kiwei ki nongkieng lieng kayak kiba paw ki ban wan iashimbynta na ki 20 tylli ki Ri ka pyrthei ha kane ka tamasa.
Ia kane ka tamasa la pynlong da ka Ri-Bhoi Watersports and Tourism Cooperative Society ha ryngkat bad ka Goodwave Adventure, Bangalore bad la iarap kyrshan pisa da ka Tnad Tourism ka Sorkar Jylla. Ki Nongpyniaid ia kane ka tamasa kila pynbna ba ka Megha Kayak Festival 2022 kan dei kaba heh duh na ki Adventure Sports event bala pynlong ha Ri India.
Lah ban kdew hangne ba ia ka Megha Kayak Festival la sdang nyngkong eh ha u snem 2016 bad hadien kane, la lah ban pynlong sa 3 sien hynrei la pynsangeh noh arsnem namar ka jingwan lynshop jong ka khlam Covid-19.
Ki Nongpyniaid kila pyntip ba ka jingthmu jong kane ka tamasa ka long ban kyntiew ia ka Adventure Tourism bad ban iarap pynlong ia ka Meghalaya kum kawei na ki jaka wan ialehkai water sports ha ka pyrthei.
U Ian Vincent, uba la ju kieng lieng kayak la bun bun snem bad uba ju mihkhmat ia ka Australia ha ka European Cup bad World Championship, u dei uba seng ia ka Whitewater Village, Umtham, kaba la sdang treikam naduh u snem 2015 da ka thong bad jingiohi jngai ban wanrah ia ka Meghalaya ha ka map jong ka watersport.
