SHILLONG, Nailur 09: Ka ïingdorbar Thawaiñ ka jylla kala pynkhreh ban ym pyndonkam ia ki kot ki sla.
Ki ophisar bad ki nongtrei jong ka Ministry of Parliamentary Affairs, Assembly Secretariat bad NIC hynne ka sngi Thohdieng, hadien ba la wai, ka sngi sdang jong ka Dorbar, kila pynlong ia ka jingai jinghikai ia ki 60 ngut ki MLA jong ka jylla.
Hashwa ban ai jinghikai ia ki MLA, u Lamphang ka iingdorbar u Bah Metbah Lyngdoh ula ong, “Ka por kala dei ban pynlong iaka iingdorbar ban pyndonkam noh da ki kor ka juk mynta da kaba pyntreikam iaka National e-Vidhan Application (NeVA).”
Ka NeVA kadei ka Mission Mode Project lyngba ka Digital India Programme bad Ministry of Parliamentary Affairs kadei kaba pyntreikam ha baroh 31 tylli ki jylla bad Union Territory bad ki iing dorbar thawaiñ.
Ka NeVA ka thmu ban wanrah hajuh ia baroh ki iing dorbar thawaiñ ha kawei ka rynsan da kaba thaw iaka Data Depository kaba ïar bad ka pynlong iaka iing dorbar ban ym pyndonkam ia ki kot, da kaba pyndonkam ia ki kor elektronik ban pyniaid ia ki kam ki jam jong ka iingdorbar.
Ka jingbei tyngka iaka NeVA kadei lyngba ka skhim jong ka sorkar pdeng ha kaba 90% yn pynlut da ka sorkar pdeng bad 10% yn pynlut da ki jylla ka thaiñ shatei lam mihngi, katba ia ki Union Territories la mang da ka sorkar pdeng 100 na ka 100.
U Bah Lyngdoh ula ong, hapoh ka iing dorbar yn bujli noh iaka jingpyndonkam iaki kot ki sla da ka e-book bad baroh ki jingpyniaid ia ka dorbar kan long Online noh khnang ba ki nongshong shnong kiba don hangno hangno ruh kin ioh ia ki jingtip.
“Kane ka Application kan iarap shibun ha kaban iada iaka mei mariang bad khamtam ban iada da ki lak tylli ki dieng” u la ong.
