Shillong , Jymmang 01 : Ka kynhun Myntri ka Sorkar Jylla kala ai jingmynjur ia ka jingtyrwa ban pynkha ia ka kam Director ka Civil Defence ha ka Directorate of Civil Defence and Home Guard.
Haba pyntip ia kane sha ki lad pathai khubor, u Myntri bad Nongaiktien ka Sorkar Bah Paul Lyngdoh ula ong “Ha ka Directorate of Civil Defence and Home Guard, ngi la rai ban pynkylla ia ka Service Riles ban lah pynkha ia ka kam Director of Civil Defence kaba pyniaid mynta da u Commandant General ka Home Guard”.
“Ngi la rai ba khnang ban lah pynjanai ia ka jingtreikam jong ka Tnad Civil Defence bad Home Guard, ka kam Director of Civil Defence kan long mynta kum kawei pat ka kam bad ngi la pynkha ia kane ka kam khnang ban lah pynkiew kyrdan ia ki Joint Director, kiba la shakri ym duna ia ka 3 snem ba kin kiew sha ka kyrdan Director. Kane kan ai mynsiem ruh ia ki Ophisar kiba la don ka jingshemphang bad jingstad ha ka jingshakri jong ki hapoh ka tnad” ula bynrap.
