Tura Naitung 20: Ka Myntri ka Koit ka Khiah Kong Ampareen Lyngdoh kala pynsangeh noh ia ka jingleit sha Tura bad kala wan phai noh sha Shillong namar ka jingthmu jong ka ACHIK ban pdiang da ki jingiakhih kaba la sdang da ka jingiaid rally thuk thuk ha sor Tura ban pyrshah ia kane ka Myntri Sorkar ba kynthoh ia ka jingdawa Nongbah Tlang ha Tura.
Ka Kong Ampareen kaba la poi ha Resubelpara, North Garo Hills ha ka sngi Palei, kala dei ban poi sha Tura ha ka por janmiet ban pynlong ia ka jingialang bishar kam ha ka sngi kaba bud bad ki Ophisar ka Koit ka Khiah ha Circuit House, Tura.
Ha ryngkat ka jingsyndan u Mission Director ka National Health Mission Ram Kumar S bad u Commissioner and Secretary ka Tnad ka Koit ka Khiah Joram Beda, ka Myntri ka dei ban sahmiet ha Tura Circuit House bad sa shong ia ka jingialang bad ki Heh Ophisar ki lai District, ka West, South West bad South Garo Hills ha ka sngi kaba bud.
Hynrei, ka Kynhun jong ka Myntri kila phai noh na Resubelpara bad wan phai biang sha Shillong ha kane hi ka janmiet namar ka jingioh khubor ba ki Dkhot ka ACHIK ki thmu ban pynthut ia kane ka jingleit jong ka sha Ri-lum Garo.
Haba kylli, u Deputy Commissioner ka West Garo Hills Jagdish Chelani ula pynthikna ba ka Myntri kala pynsangeh noh ia ka jingleit jong ka sha Tura namar ka jingmih kiwei ki kam ba donkam.
Hynrei ka daw hi ka ba paw ka long ba kane ka rai jong ka Myntri ban wanphai noh ka dei namar ka jingmih paidbah ki briew ban pynrem halor ka jingkynthoh jong ka ia ka jingdawa Winter Capital ha Tura.
Ha ka sngi Palei, haba ioh jingtip ia ka jingwan ka Myntri sha Tura, da ki phew ngut ki nongiakhih na ki kynhun bapher bapher bala ialam da ka ACHIK bad Garo State Movement Committee, Tura Government College Students Union bad ka United Garo People’s Front, kila pynlong ia ka jingiaid rally da ka thuk thuk bad rah lama iong ban pynrem ia kane ka jingkren ka Myntri.
Kine ki nongiaid rally kila pyrta slogan ruh “Go Back, Ampareen, We Demand Winter Capital,” (‘Leit phai noh Ampareen, Ngi dawa ia ka Nongbah Tlang”) haba ki iaid ha kylleng ki jaka ka sor Tura.
Haba antad ban ioh ia ka jingpdiang ka bym sngewtynnad haba poi ha Tura, ka Myntri kala rai ban kiar bad wanphai noh sha Shillong na Resubelpara.
Pule lang ia kane: Dawa ka HYC ban pynlong ia ka West Khasi Hills kum ka “Nongbah Synrai’
