Guwahati, Naiwieng 18 :Ki kam pynher syrngiew jong ki hati khlaw ki dang iai bteng ha ki bynta jong ka Goalpara district ka Assam, kata hadien ba ka kynhun jong ki hati kila wan tur sha ki jaka shong shnong ha ka 17 tarik mynta u bnai bad pynjulor ia kawei ka Anganwadi Centre hapoh ka district.
Kine ki hati khlaw kila wan mih na ki jaka khlaw na ka bynta ban wad bam hadien ba kila pynpra noh ia ka Hajongpara Anganwadi centre ha ki bynta jong ka West Matia hapoh Goalpara district.
Dang ha kine ki ar sngi ba la dep, uwei u hati khlaw ula pyniap ia kawei ka longkmie bad u khun ba dang rit ha Matia bad hadien kawei ka jaka ri sniang jong ka sorkar kala shah pynpra noh ha ka kynhun ki hati khlaw.
Ha ka 1 tarik mynta u bnai, da ki spah tylli ki pyntha kba ha ki bynta jong ka Numaligarh hapoh Golaghat district ka Assam kila shah pynjulor hadien ba ka kynhun ki hati na ki bynta jong ka Morongi kila wan ban thombor naphang ia kine ki jaka rep.
Na ka liang ki nongrep ha katei ka thain kila pynpaw ba kila ngat ha ka jingduh nong kaba khraw na kane ka jingwan thombor jong ki hati ia ki pyntha kba bad kiwei pat ki jingrep jong ki.
Ka jinglong jingman ha ka thain Teliya Gaon, Miripathaar, Dholakachari, Purajanghal, Folongi, Habigaon, Udayan, Akhoifutia, Harorgaon, Haldhibari kila shah ktah jur namar ki kam thombor jong ki hati khlaw mynta lah shi bnai kynthih.
Na ka liang ki trai shnong kila kynnoh ruh ia ki nongtrei jong ka tnat forest ki bym shym la pynsngap wat hadien ki khubor jong ka jingshong syier hapdeng ki paid nongshong shnong namar kane ka jingwan thombor jong ki hati.
