Shillong, Nailar 5: U Symbud Myntri Rangbah ka Jylla uba khmih ia ka tnad Transport u Bah Sniawbhalang Dhar hynne ka sngi Balang, ula ong, ba ka Sorkar Jylla kala pynjlan ia ka Electric Vehicles Policy sa 3 snem, ha kaba yn ai jingmyntoi ne jingiarap ia ki nongthied ia ki kali elektrik kadei ka kam kaba dang iasyllok bad ka tnad pla tyngka.
“Ka Kynhun Myntri kala shim ia ka rai da ka jingai jingmynjur ka jong nga ban pynjlan sa 3 snem. Mynta ngi dang khein ia ka bynta ban ai jingmyntoi namar ba ngi dang khmih bniah ha kaba iadei bad ka jingktah ia ka pisa ka tyngka. Ngi dang ap ia ka tnad Pla Tyngka ka Jylla” la ong u Bah Dhar.
Ula ong, ba ka sorkar kan sa rai ia ki jingtip kiba pura hadien ba la dep ban khmih bniah ia ka jingktah ha baroh ki liang ha kaba iadei bad ki bynta jong ka jingai jingmyntoi.
“Ngi hap ban peit ha baroh ki liang. Lada ngi ai katne ki jingai jingmyntoi ia katne tylli ki jingdon jong ki kali, katno ngin shah ktah?. Ngin sa shim ia ka rai kaba khatduh” ula ong.
U Bah Dhar ula bynrap ba ia ki jaka ban Charge kan dei ruh ka bynta kaba kongsan bha.
“Ka mat kaba nyngkong kadei ka jingai jingmyntoi ban pynshlur ia ki paitbah. Ka mat ka baar haei ka jaka ban Charge. Lada ngi ai ia ki jingmyntoi hynrei kim don pat ki jaka ban Charge, te kan long pat kumno? Ngim lah ban ban shu shim rai ha suiñ” ula ong.
U Symbud Myntri Rangbah ba ka jingshim rai ka dang sahteng ha kaba iadei bad ki jait kali bad ka rukom ai ia ki jingai jingmyntoi.
“Ngi hap ban rai ia kiei ki jait kali kiban ioh ia ki jingmyntoi, la kan dei ha ka liang jong ka jingrejistar ne ka jingthied ia ki kali kiba thymmai. Kane kadei ka bynta kaba ngi hap ban shim ia ka rai” ong u Bah Dhar.
Ula pynpaw ba kane ka jingpynjlan kadei kaba la pynbna namar ba ka polisi kaba kham hashwa kala kut noh bad ka sorkar ka dang pynkhreh ia ki lad ai jingmyntoi ne jingiarap na ka bynta kito kiba kynriah noh sha ki kali elektrik.
