Shillong, Nailur 15: Katba ha baroh kawei ka ri India ki nongtrei kila ioh ia ka tulop 8th Pay Commission, ki nongtrei Sorkar ka Meghalaya pat ki dang sahkut ha ka 5th Pay Commission.
Ka Meghalaya State Government Employee Federation (MSGEF) ha ka sngi Nyngkong, kala leit ban iakren markhmat bad u Myntri Rangbah ka Jylla Conrad K Sangma bad dawa ban kyntiew mardor iaka tulop.
“Ngi la ai ia ka dorkhas ban dawa bishar bniah bad kyntiew noh iaka tulop jong ngi” ong ka Secretary General jong ka MSGEF Kong Banshari Kharshandi.
Ka la ong ba ka Delhi ka la dep kyntiew iaka tulop ki nongtrei Sorkar Pdeng, hynrei ha Meghalaya ka tulop ka dang neh kumjuh.
“Ka Sorkar Pdeng ka la dep ban kyntiew iaka tulop ki nongtrei jong ka. Ngi kwah ba u Myntri Rangbah jong ngi un bishar bniah ia kane bad ban kyntiew noh iaka tulop jong ki nongtrei Sorkar jylla,” ka la ong.
Ka Kong Banshari ka la ong ba ki nongtrei ki la shah pynduh arsien ia ka jingkyntiew tulop.
“Ka jingkyntiew tulop ba khatduh jong ngi ka long ha u snem 2017, hynrei ngi la duh ha u snem 2006 bad ngi la duh biang ha u snem 2016. Ka Sorkar Pdeng ka kyntiew tulop man la ka 10 snem hynrei ngi la mad ïa ka jingduhnong kaba khraw,” ka la ong.
“Ngi dang don ha ka 5th Pay Commission. Wat hapoh ka thain sahthei lammihngi, ki jylla ki la ioh tulop katkum ka 7th Pay Commission, mynta ki kwah ba ngin ioh noh daka 8th Pay Commission” ka la bynrap.
Ka la ong ba u Myntri Rangbah ka jylla u la pynthikna ba un sa eksamin ia kane ka kam.
“Ka shong ha ka Sorkar mynta ban shim khia halor kane. Ngi kwah ba ka sorkar kan pyrkhat ia kane ka jingtyrwa jong ngi” kala ong.
