Shillong, Rymphan 07: Ka NorthEast United FC kala pynbna ba kala pynjlan ia ka kontrak ialehkai bad u Redeem Tlang haduh u snem 2027.
U Redeem Tlang ula sdang ban ialehkai na ka NorthEast United FC naduh ba sdang ia ka Indian Super League (ISL) ha u 2014, hadien ba ula ialehkai football na ka kynhun Shillong Lajong. Hadien ka jingmihkhmat ia ka Shillong Lajong, FC Goa bad Odisha FC, ula wanphai biang sha ka NorthEast United FC ha u Naitung 2023.
U Redeem ula long u nongialehkai uba kongsan ha ka kynhun kaba la khmih da u Juan Pedro Benali kum u coach, ha kaba ula mih ialehkai 17 sien ha ka samoi ialehkai jong u snem 2023-24. Mynta ka samoi ula ialehkai bha bad ula ioh syndon ia ka kabu ban mih naduh ba sdang jong ka jingialehkai.
“Nga dang da ka jingkmen ban don ha ka NorthEast United FC. Nga ngeit ha ka rukom pyniaid jong ka Club bad ia ka jingkyrshan kaba nga ioh na ka kynhun kaba ai jinghikai bad na ki bor pyniaid kaba long kaei kaei kaba sngewtynnad bha. Nga ngeit skhem ba ngin lah ban ioh pdiang ia kiei kiei kiba khraw da kaba iatreilang bad nga kular ban aiti lut ban iarap ia ka kynhun ba kan kynjoh sha ka thong” la ong u Redeem Tlang.
U Head Coach, Juan Pedro Benali ula iaroh ia ka jingling nongialam u Redeem hapoh jong ka madan bad shabar ka madan da kaba ong, “U Redeem u long uba kongsan bha ban don ryngkat bad ngi bad ngi dap da ka jingkmen ba yn iai neh bad ka longiing jong ka NorthEast United. Ula sdang ia ka jingiaid lynti ka jongu ha ka ISL bad ka NorthEast United FC bad ngi kyrmen ruh ba yn pynkut bad shongthait ia ka jingialehkai ka jongu hangne hi”.
“U Redeem u lah ban ialehkai ha kiba bun ki bynta bad ula ong uba kynsa ha ka kynhun ka jong ngi. Nalor kane, ka jingiai bteng ban tei ia ka kynhun kaba khlain kadei ka jingiohi jngai ka jong ngi bad u Redeem u long uba iahap bad uba biang tam. Ka long kaei kaei kaba donkam ia ngi ban pynjlan ia ka kontrak bad u” ong u Mandar Tamhane, CEO ka NorthEast United FC.
“Na ka bynta ka jong ngi, ban ialehkai ha ka sien kaba nyngkong ia ka ISL ha Shillong, u Redeem uba long u nongshong shnong, ula ai ia ngi ka kabu kaba biang tam ban pynbna ia ka jingpynjlan ia ka kontrak ka jongu hakhmat jong ki bahaiing” la bynrap u Tamhane.
Ka NEUFC ka la sdang ia kaei kaei kaba sngewtynnad bad kaban sah jingkynmaw da kaba pynbna ban pynjlan ia ka kontrak jong u Redeem Tlang.
Ha ka jingiakhun hapdeng ka NorthEast United FC pyrshah ia ka Mumbai City FC ha ka minit kaba 22 (kaba dei u number jersey u Redeem Tlang), ka Club kala pyllait ia ka jingthoh (Placard) kaba ong “Redeem Stays 2027,” ia kaba la bat da ki bahaiing ki jongu.
“Kane ka long ka khyllipmat kaba kmen ia ka longiing jong ngi” ong ka Emmon Tlang kaba dei ka kmie jongu Redeem.
“Ngi lah wan sha JLN Stadium ban peit ia ka football da ki snem bad mynta ban donbynta ha kaban pynbna kaba long shisha kaei kaei kaba kyrpang bha”.
