Shillong, Risaw 30 : Ka Iingkashari Meghalaya High Court kala bthah ba ka hukum ba pynmih shipor- kaba pynsangeh ia ka jingweng noh ia ka hukum thungkam pura ia palat 30 ngut ki nongtrei casual da ka EC ka VPP ha KHADC- kan dang bteng ban treikam.
“Ka hukum ba shipor bala pynmih kham hashuwa kan dang bteng ban treikam tad haduh kawei pat ka tarik” ong ka Iingkashari bala khlieh da u Justice HS Thangkhiew ha ka hukum ba pynmih ha ka sngi Palei.
Ka Iingkashari kala shong bishar ia ka mudui jong palat 30 ngut ki nongtrei ba shah ktah, kiba la tynjuh pyrshah ia ka rai jong ka EC ka VPP ha KHADC.
Ia kane ka muktduma la buh ban shong bishar shuh shuh ha ka 18 tarik u Naiwieng.
Kat kum ka jingpynpaw ki nongmudui, ka EC ka KHADC kala pynduh ia ka hukum thungkam pura ia ki ha ka 30 tarik Jymmang, 2025, khlem da ai notice lane ka lad ban sngap ia kine ki nongtrei ba shah ktah.
