Shillong, Risaw 30 : Ka Iingkashari Meghalaya High Court kala hukum ia ka Sorkar Jylla ba kan ai jingtip halor ka rai hapoh ka shitaiew ba iadei bad ka jingtyrwa iapynbeit ia ka kam ba iadei bad ka Suraksha Salvia LLP, kaba pyniaid ia ka diagnostic centre ha Pasteur Hill, Shillong.
Kane ka hukum ka Iingkashari kala mih hadien ba u nongiasaid ka nongmudui, ula pyntip ba ka jing tyrwa ban iapynbeit lah dep ban phah sha ka Jylla, hynrei haduh mynta ym pat ioh jubab satia.
U nongiasaid ka Jylla, ula pynpaw ba ki kot ki sla bala ai ban kyrshan ia ka jingiapynbeit, la shem ba kim long satia kiba dei hok bad ka Jylla kam mynjur satia ban iapynbeit ia ka jingiakajia.
“La bthah ia ka Jylla ba kin ai jubab ia ka rai haba iadei bad ka jingtyrwa iapynbeit sha u Advocate-on-Record hapoh ka shitaiew naduh mynta ka sngi” ong ka Division Bench ba kynthup ia u Chief Justice Soumen Sen bad Justice W Diengdoh ha ka hukum ba pynmih ha ka sngi Palei.
Ia kane ka mukotduma la buh ban shong bishar shuh shuh ha ka 19 tarik Naiwieng, 2025.
