Shillong, Rymphang 06: Ki bor pyniaid District jong ka East Jaintia Hills kila pynjari ia ka kyndon 144 CrPC ha khappud ka District ba mana tyngeh ia ki paidbah ha ki thaiñ khappud kiba thmu ban jam sha u pud u sam ka ri Bangladesh ne ban wan rung shapoh ri India khnang ban tehlakam ia ki kam khaii tuh.
Ka hukum bala pynmih da u District Magistrate A Baranwal ha ka sngi Baar ka ong, “Ba ka jingleh be-aiñ, ki kam sniew, ka jingkhai be-aiñ, ki kam ki bym iahap, ka jingkhaii be-aiñ ia ki masi, ki mar bad kiwei kiwei kum u kwai, ka tungtap, slasha bad kiwei kiwei kidei kiba la mana pyrshah”.
“Ka jingiaid jingieng ki briew da ka kjat ne kali hapoh 5 Km jong ka thain khappud naduh ka por 6 baje janmiet haduh 5 baje mynstep kadei kaba la khang pyrshah” ong ha ka hukum.
Ha ka hukum ka ong ba kat kum ka jingpyntip ki BSF, ka AOR jongka 172Bn ka dei ka jaka kaba jur bha ka jingkhaii tuh ia ki masi bad ia ki jingdih pynbuaid kiba sniew bad kiwei kiwei ki mar ki mata kum u kwai, tungtap, biri, sikret, slasha bad kiwei kiwei.
La pyntip ruh ba la iohpdiang ia ki jingtip na ki BSF ba ki nongkhaii bad kiwei kiwei ki nongleh kam sniew ki ju ialum briew shibun bha ha ki jaka khappud ha ka por mynmiet ban khaii ia kitei ki mar na India sha Bangladesh ne na Bangladesh shapoh ri India.
La pynpaw ruh ba ki dkhot jong ki kynhun lehnoh bad ki Rohingyas kin pyrshang ban rung shapoh u pud u sam jong ka ri India ha ka por miet bad kane kan ktah jur iaka shongsuk shongsain hapoh ka jylla bad ka bynrap ba dang shen kala don ka jingpyniap pathar ia uwei u nongshong shnong ka Umkiang da ki nong Bangladesh kiba la wan rung be-aiñ shapoh ri India.
U District Magistrate ula pynpaw ba ia kum kitei ki kam be-aiñ, dei ban tehlakam ban pynneh ia ka shongsuk shongshngain ha ka District.
