Nongstoin, Nohprah 21: U Deputy Commissioner ka West Khasi Hills Bah Garod LSN Dykes, ula pynjari da ka kyndon 144 CrPC ha baroh kawei ka District ba khang pyrshah ia ka jingtreikam beain jong ki karkhana coke ki bym pat ioh jingbit.
Ka Iingkashari Meghalaya High Court dang shen kala hukum ia u Chief Secretary ban khang khyrdep ia ki karkhana coke kiba treikam beain ha West Khasi Hills.
Kat kum ka hukum ka Iingkashari la pyntip ba ki don haduh 16 tylli ki karkhana coke kiba treikam beain hapoh West Khasi Hills District. Ka Kashari kala bthah ban khang khyrdep mardor ia kine ki karkhana naduh ba mih ka hukum, kaba mih ha ka 16 tarik u Nohprah.
Halor kane ka hukum, u Deputy Commissioner ka District ula pynjari ia ka kyndon ba khang pyrshah ia ka jingtreikam jong kine ki karkhana kiba beain. Ula ong ba kane ka hukum kan treikam mardor haduh da pynbna da kumwei pat.
