Shillong, K’lyngkot 27 : Ka District Magistrate ka East Khasi Hills, kala pynjari ia ka kyndon 163 BNSS kaba khang pyrshah ia kino kino ki kynhun ba kin pynlong ia kino kino ki jingiakhih hapoh ka District namar ka jingdon jong ka elekshon MDC.
Kat kum ka hukum, ka District Magistrate kala pyntip ba kala ioh khubor ba ki don ki seng kiba don jingthmu ban pynlong ia ki jingiakhih kum ka jingshah jingit, iaid paidbah, rally bad kiwei kiwei hapoh ka District.
Ka pynpaw ba lada ailad ban pynlong ia kine ki jingiakhih, ka lah ban pynmih ia ki jingkulmar bad pynthut ia ka shongsuk shongsain bad pynthut ruh ia ka jingiaid beit iaid ryntih jong ka elekshon KHADC, ka ban long la 21 tarik Rymphang.
Lah ban kdew ba u Lat ka Jylla, ula pynmih ia ka jingpynbna ban pynlong ia ka elekshon KHADC bad JHADC ha ka 21 tarik u Rymphang.
Ka Sorkar Jylla kala sdang pyntreikam ruh ia ka Model Code of Conduct bad kiwei kiwei ki jingbthah jong ka Tnad District Council Affairs (DCA) hapoh ka Jylla baroh kawei.
Ka District Magistrate kala pyntip ba ka hukum ba pynjari ia ka kyndon 163 BNSS kan treikam noh mardor tad haduh da pynmih da kawei pat ka hukum.
