Shillong, Lber 28: U Sub Divisional Magistrate ka Sohra Civil Sub Division, ha ka sngi Palei, ula pynjari da ka kyndon 144 CrPC ba khang ba ialum briew ba 4 ngut ne palat, ban rah tiar pynmynmaw bad kren ia ki ktien ba pynshit hapoh ka Sub Division.
Ia kane ka hukum la pynhun namar ka jingsyier ioh mih ka jingthut ka shongsuk shongsain ha Sohra Sub Division na ka daw ka jingshah pyniap ki arngut ki bar Jylla kaba jia ha shnong Ichamati bad Dalda ha ka janmiet 27 tarik Lber.
Ka hukum ka ong ba ki don ki jingsngewkhia halor ka jingshngain ki paidbah bad ka jingiada ia ki bad kumta la donkam ban shim ia kane ka sienjam ban nym don shuh ka jingduh ki mynsiem briew bad ban tehlakam ia ka shongsuk shongsain ha ka thain.
Ia kane hukum la pynmih da u SDM Sononi Verma, bad kan treikam ha baroh kawei ka Sub Division naduh ka sngi Palei tad haduh da pynmih da kawei pat ka hukum.
Ka hukum ka ong ba ym shah ban ialum paidbah/ jingialang/ne iashong palat 4 ngut ki brew ha kino kino ki jaka paidbah ba hap hapoh ka Sohra Sub Division tad haduh da pynmih da kawei ka hukum. Kine ki kynthup iaki rally, ki tamasa bad baroh ki kynja jingialang ba ialum paidbah.
La pyllait pat tang ia ki jingialang/jingiaid paidbah ba iadei bad ka elekshon Lok Sabha, 2024 hynrei kane ruh ka dei hadien bala ioh jingbit n aka Ophis u SDO (Election) Sohra.
Ka hukum ka ong ruh ba la mana ia baroh ki briew hapoh ka Sohra Sub Division ba kim bit ban kren ia kino kino ki ktien kiba pynshit, pyrta slogan, phah khubor da ka ktien ne ki kor electronic kiba lah ban pynshit lane aiding ia kane ka jingjia.
La khang ruh ia ki briew/ki seng/ ki kynhun ha Sohra ba kin pyndonkam ia ki tynghung, amplifier lane kino kino ki tiar hapoh lane ha ki kali shimet lane ki Iing ki sem lane jaka paidbah lada kim ioh jingbit na ki bor khmih.
Ka hukum ka ong ba kino kino kiba pynkhreh ia kane ka hukum kin shah pynsajia kat kumka kyndon 188 jong ka Indian Penal Code (IPC).
