Shillong Nailur 15: U Chairman jong ka JHADC u Dr. Sankey Shangpung uba long ruh u MDC ka UDP na Bataw bad u MDC ka HSPDP na Sohiong Constituency Bah Sherborlang L Mawlong hynne ka sngi kila leit ban pyniasoh noh ialade bad ka seng NPP.
Ia kitei ki MDC la pdiang sngewbha da u National President ka NPP u Conrad K Sangma ryngkat ka jingdonlang u National Vice President ka NPP u Bah Prestone Tynsong, u President ka NPP Meghalaya u Dr WR Kharlukhi bad kiwei kiwei.
Warm welcome to Dr. Sankey Shangpung, Hon’ble MDC & Chairman of JHADC, Sh. Sherborlang L. Mawlong, Hon’ble MDC and other new members to the NPP family. Together, we will work for our people and bring positive transformation to our State. pic.twitter.com/ixy2aIe5pa
— Conrad Sangma (@SangmaConrad) September 15, 2022
U Dr Sankey u la ong, ka daw kaba la pynlong ia u ban mih noh na ka UDP ban pyniasoh sha ka NPP, kadei hadien ba ula bishar bniah bad iohi ba dei tang ka NPP kaba nud ban leh ia ki kam kaba kiwei pat kim nud bad ula ong dei tang ka NPP kaba la nud ban shimkhia ha kaban pynbeit ia u pud u sam, ka ishu Them Metor bad kiwei kiwei.
U la ong, ruh ba ka seng NPP kan sa ioh ban thaw sorkar marwei ha u 2023.
Katba u Bah Sherborlang, u la ong ba ka jingwan rung jong u sha NPP ka dei namar ba dei ka party kaba kham bha shuh shuh bad kala leh shibun ki kam ba bha ha kaba bun ki shnong ki bym don surok bad ki bym ioh um mynta ki la ioh ia kine.
U Conrad K Sangma, u la ong ba ka seng kat nang mih ki sngi ka nang khlain bad ka NPP ha ka synshar Khaddar ka buh hakhmat eh ia u paidbah bad ban trei ruh na bynta ki paidbah ka jylla.
“Ha kine ki khyndiat snem, ngi iohi ba ka jylla ka la kylla watla ngim lah ban kam ba la pynkylla lut baroh. Hynrei ka party ka la ialeh ban wanrah ia ka jingkylla ha kaba kila sdang ban tei 2.2 km ki surok man ka sngi ha ki jaka nongkyndong” ula ong
“Haba sdang ia ka jylla, ki don tang 4000 tylli ki longiing hynrei mynta 2.5 lak tylli ki longiing kiba ioh um da u pipe haduh tyngkong iing. Ngi don ar tylli ki kad liengsuin, ha Umroi bad Jinjal bad ngi la rai mynta ban jer ia ka Umroi Airport da ka BB Lyngdoh bad iaka Jinjal yn jer kyrteng noh da ka Capt. WA Sangma,” bynrap u Conrad Sangma.
U Bah Prestone Tynsong, u la ong ba lyngba ka jingwan jong kine ki nongialam, ka NPP ka la nang ioh mynsiem bad u la kam ba kitei ki ar tylli ki konstiwensi kin dei jong ka NPP ban jop ha u 2023.
U bah Prestone, u la ong “Ha ka party NPP uba dang wan mynta, hynnin ne uba la don 10 ne 20 snem, baroh ngi long kawei beit. Lada im, ngi im lang, ha kiwei don kiba rim bad kiba thymmai, im ma nga, iap ma phi hynrei ha ka NPP kam don kum kata namar ba ngi shakri na bynta ka jylla bad ki rit paid ka thain Lammihngi bad ka ri baroh kawei.”
