Shillong, Nailur 15 : U Myntri Rangbah ka Jylla Conrad K Sangma hynne ka sngi Palei ula pynbna ia ka rai jong ka Sorkar ban pynkiew noh ia ka bai bam tynmen jong ki riew tynmen, ki briew ba don jingduna dkhot met bad ki Longkmie ba marwei (single mother) sha ka T. 9000 shisnem.
“Naduh u bnai Risaw mynta u snem, ka bai bam tynmen jong ki tynmen, kiba duna dkhot met bad ki longkmie ba marwei kan kiew noh n aka T.6000 sha ka T.9000 shisnem” ong u Conrad haba jubab ia ka mat iatai ba lyngkot hapoh ka Iingdorbar Thaw Ain.
Kat kum ka jingong jong u, ka dei ka jingdawa kaba la slem jong kine ki briew kiba la mad ia ki jingeh bad ki bym ioh satia ia ka song pisa kaba biang.
“Nga sngewthuh ba kane ka song kam pat biang satia ia ki ban pyndonkam na bynta baroh ki jingdonkti jong ki hynrei ia kaei kaba ngi lah, ngi la pyrshang ban peit bad iarap” bynrap u Conrad.
