Aizawl, Nailur 17 :Ha ka jingjia kaba la ktah jur ia ka party synshar Mizo National Front (MNF), haduh 16 ngut ki nongialam jong kane ka party, kaba kynthup ia u president ka MNF youth wing na Chakma district, u Molin Kumar Chakma kila mih noh na kane ka party bad leit pyniasoh sha ka seng BJP hynnin ka sngi Thohdieng, ong ki tyllong khubor ka BJP.
Ia kine ki nongialam la pdiang burom ha ka jingialang ba la pynlong hapoh ka ophis jong ka party BJP ha Chawngte Kamalanagar kaba hapoh Lawngtlai district, ong ki tyllong khubor.
U riewsain hima ba la rim ka Chakma uba dei ruh u myntri sorkar barim u Nirupam Chakma bad u nongmihkhmat barim u Alak Bikash Chakma kila ia don lang ha kane ka jingialang.
U president barim jong ka District School Education Board (DSEB) ka Chakma Autonomous District Council (CADC), u Molin Kumar Chakma ula ia aireng ha kane ka ilekshon jong ka council ha ka snem 2018.
Kham hashwa u Molin ula don bad ka seng BJP bad bat ruh kum u District President ha ka BJP CADC ha ki snem 2002-2004.Ula trei ruh hapoh ka seng Central Young Chakma Association (CYCA) kum u Senior Vice-President naduh ka snem 2011 haduh u 2016.Ula trei shitrhem bad ialam ia ka Chakma District MNF Youth Front kum u President na ka bynta 4 snem kynthih, kata naduh ka snem 2018.
Ki 15 ngut kiwei pat ki nongialam jong ki unit ka MNF kiba la leit ban pyniasoh bad ka BJP ki dei na ki council jong ki shnong kum ka Bajeisora, Baganpara, Ugudasury ‘N’ bad Montola kiba hap hapoh ka 4-Bajeisora MDC constituency.
Haba kren ha ka jingialang u Molin Kumar Chakma ula ong ba ka MNF ka dei kaba la ieng pyrshah ia ka CADC mynta lah 10 snem kynthih, bad kila kynthoh pyrshah ia ka sorkar Congress halor ka jingpynkylla khah khah ia ki Chief Executive Member (CEM) hapoh CADC bad khot ruh ia ki nongialam ki CADC Congress ki riew bamsap.
“Mynta kitei ki nongialam barim ka Congress kila pyniasoh bad ka Chakma District MNF bad kila ynshar ia ka Council.Namar ki jingiakynad kiba napoh napoh, kumta ruh ki nongshong shnong kila dep lypa ban sakhi haduh 5 ngut ki CEM bad kam don kano kano ka jingshngain ha ka sorkar CADC ba la lamkhmat da ka MNF,” ong u Chakma uba la bynrap ruh ba um iohi satia ba ka MNF kan don ia kata ka lawei.
Shuh shuh ula kynnoh ruh ba ka CADC kan ngat ha ka jingjot lada ka MNF kan dang iai bteng ban synshar ia ka sa na ka bynta kawei pat ka samoi.Ula ong ruh ba ka lawei jong ka CADC ka don ha ki kti jong ka BJP bad u Myntri Rangbahduh (PM) Minister Narendra Modi.
Kumta ula kyntu ia ki paidbah jong ka thain Chakma ban pyniasoh bad kane ka party sain hima kaba heh tam ha ka pyrthei lada ki paidbah jong ka CADC ki kwah ban iohi shisha ia kata ka roi ka par hapoh ka thain.
