Nongstoin, Naitung 21 : U Myntri kam ialehkai ka Jylla Bah Shakliar Warjri, ha ka sngi Saitjain, ula pynhap pyrda noh ia ka lympung ialehkai Knock-Out Football Tournament 2023-24, kaba la pynlong da ka Jingiaseng Samla Balang Presbyterian Mawlieh.
Ia kane ka lympung ialehkai la pynlong kum shibynta ban pynmih pisa na ka bynta ka Balang hashwa ba kan rakhe ia ka jingdap 150 snem ha u snem ban wan.
Ha katei ka lympung, jan baroh ki balang kiba hap hapoh ka Ditrict Mawlieh ki la wan ban їashim bynta, hynrei kiba la poi sha ka ba kut ban їaknieh їa ka nam lah duh ki dei ka Veteran Block I pyrshah їa ka Veteran Block II.
Ha katei ka sngi shuwa ban sdang їa ka final namar ka dei artad ka taїew ba kyrpang jong ka jingїaseng kynthei (Women Week) kaba la pynbeit da ka KJP Assembly, ka jingїaseng samla ka la pynlong їa ka jingїalehkai paralok jong ki kynthei hapdeng ka jingїaseng kynthei Balang Presbyterian Mawphansin pyrshah їa ka jingїaseng Kynthei Balang Presbyterian Mawsaw, ha kaba ka Jingїaseng kynthei Balang Mawphansin ka la jop da shi kol la nod.
Ha ka jingїalehkai phainal hapdeng ka Veteran Block I pyrshah їa ka Veteran Block II, ka Veteran Block II ka la jop da ka tie breaker kaba long san la saw kol.
Ha kane ka lympung, na ka liang ka Jingїaseng Samla ka la pynsngew їa ka memorandum bad la aiti sha u Myntri ba un leh їa kaba don kam.
Haba ai jingkren, u bah Shakliar Warjri, u la ong ba ka jingpynkhreh jong ka Balang ban rakhe їa ka jingdap 150 snem, ka hap ban їakynduh shibun ki jingeh hynrei haba ka Balang ka pynkhreh na ka bynta ka kam kaba bha, kan long kaba seisoh lyngba ka jingkyrkhu ka jong u Blei Trai kynrad.
