Shillong, Naiwieng 04: U Senior Advocate ka jylla u Bah VGK Kynta hynne ka sngi Thohdieng, ula pynbna ba yn iakhun iaka elekshon MLA 2023 na Nongthymmai Constituency bad shen yn sa shim iaka rai la yn iakhun kum u kyrtong shimet ne na ka seng saiñ pyrthei.
U Bah VGK Kynta ula ong, ba ula rai ban iakhun iaka elekshon MLA na Nongthymmai Constituency namar ba u don iaka jingthrang ban ai jingshakri iaka ri bad iaka jaidbynriew.
“Nga shu lynga haba nga peit ia ki jinglong jingman ka ri ha kine ki sngi, kane ka sorkar ka pher shisha na ki sorkar por ba dang long Myntri Rangbah ki jong ngi. Kaba da pynkhuslai palat ia nga, kadei ka jingpynsyrwa ia ki jingdon jingem ka ri bad ka jylla” ula ong
U Bah Vivan ula ong “Ki khyndew ki shyiap la shu shim naphang khlem da pyrkhat shuh ia ka lawei bad kaba sngewsih eh, dei kine ki heh spah ba kila shu thied naphang ia ka khyndew ka shyiap bad ban ai sha ki nongwei, wat ia ki Ophisar kiba wan na kawei ka jylla. Lada kwah ai jaka ai sha Garo balei da ki jaka na ri Khasi”.
“Ka kam ka jam shu syrtok namar la shu ai kam na sha lyndet (back door) ia ki briew ki bym dei ki lajong. Shaei ki khynnah jong ngi kin leit. Kan myntoi aiu ban phah pule ia ki khun da kaba pynlut da ki phew lak tyngka” ula ong.
Une u Nongiasaid Ainu la ong ba ka jingthmu jong u ban iakhun elekshon kam dei ban ioh jing myntoi shimet. “Nga la biang bad nga lah ban shu sngewbha beit, hynrei im im peit peit kane ka lanot ka hap ha ka jaitbynriew” ong u Bah Kynta.
Haba kylli la yn iakhun kum u kyrtong shimet ne na ka seng saiñ pyrthei, u Bah Kynta ula ong, “Ïa mynta hi nga la rai shwa tang ba ngan iakhun iaka elekshon hynrei ngan sa puson bad shong pyrkhat bha shwa ban shim ia ka rai la ngan iakhun kum u kyrtong shimet ne na ka seng saiñ pyrthei watla kila don ki seng saiñ pyrthei kiba la wan ban tyrwa tiket ia nga”.
