Shillong, Naiwieng 04: Ka jingkiew kiba pep skul shiteng por ha Meghalaya kadei namar ka jingjaituh hi ki khynnah ban bteng ia ka jingpule ym na ka daw ki polisi ne ki jingleh ka sorkar jylla.
Ia kane la ong da u nongaiktien ka National People’s Youth Front (NPYF) u badei ruh u MDC ka Rambrai konstitwensi u bah Bajop Pyngrope haka jingiatai halor ka sain hima bala pynlong daka Sanker Dev College.
Haba kren ha kane ka sngi u bah Bajop u la ong ba kam iahap ban shu kynnoh ia ka sorkar haba iadei bad ka jingkiew ki khynnah ba pep skul bad ka jingkynnoh pyrshah iaki polisi bad iaka sorkar ka long kaba bakla haduh katta katta namar kiba bun hi ki khynnah kiba pep ki jaituh wat lada ki ioh ka lad ban leit pule biang.
“Ym lah ban shu kynnoh ba dei namar ka sorkar jylla ne namar ki polisi ba ka jylla ka iohi ka jingkiew kiba pep skul shiteng por hynrei kane dei beit namar ka jingjaituh hi ki khynnah ban bteng ia ka jingpule wat lada ki dang ioh ka lad ban leit skul” la ong u bah Bajop.
Ha kawei ka liang u bah Bajop u la kubur ruh ba ki don shi bun ki daw ban pynlong iaki khynnah pule ban pep skul shiteng por shiteng por bad ym lah ban kynnoh ba baroh ki khynnah ki jaituh ban bteng ka jingleit skul.
U bah Bajop u la ong ba lada peit sha ki thain nongkyndong kiba bun ki khynnah pule ki iohlok kloi than bad don ruh da kiwei pat ki daw ban pynlong iaki ban pep skul bad donkam ban wad bniah shuwa kino kiba pep ba kim ioh lad pule ba ban ka jingduk, kino kiba pep ba ki iohlok ne ki jaituh bad kumta terter.
