Shillong, Naiwieng 02: U MLA ka United Democratic Party (UDP) na Mawphlang Constituency bah Eugeneson Lyngdoh hynne ka sngi balang ula pynbna ba un nym mih iakhun shuh iaka ilekshon MLA 2023.
Lah ban kdew ba u bah Eugeneson Lyngdoh u ba dei ruh u khlur ialehkai phutbol ka jylla bad ka ri India ula shah jied kum u MLA ka Mawphlang Constituency naka United Democratic Party (UDP) ha ka elekshon shiteng samoi hadien ka jingkhlad noh u MLA u badei kpa jong u, bah S. K Sunn (Bam Kwai Dwar u Blei).
U bah Eugene ula pynbna ia kane ka rai ha ka jingialang jong ka UDP Mawphlang circle haka jingdon lang u president ka UDP East Khasi Hills u bah Titosstarwell Chynne lem bad ki nongkitkam jong ka party na Mawphlang kum shi bynta ban iapyrkhat kam ban pynkhreh iaka ilekshon 2023.
U bah Eugeneson ula ong ba kane ka rai ba ula shim ban nym iakhun shuh iaka ilekshon 2023 kadei kaba ula pyrkhat sani bha bad ka ka daw hi kadei na ki daw shimet.
“Nga la shim ia ka rai ban nym iakhun shuh iaka ilekshon 2023 bad ka daw hi kidei ki daw shimet hynrei watla kata ngan dang iai don bynta lang bad ka UDP bad ngan dang iai trei naka bynta ka bha ka miat ka party khamtam hapoh Mawphlang” la ong u bah Eugeneson.
U bah Eugeneson ula ong ba kane ka jingshim rai ban nym iakhun shuh iaka ilekshon kadei naka bynta ka jingbha ka party bad kumjuh shimet namar u kwah ban pynleit jingmut ha kiwei ki kam naka bynta ka bha ka miat ki paidbah bad ka thain Mawphlang.
