Shillong, Lber 06: U Conrad Kongkal Sangma uban sa long u Myntri Rangbah ka jylla, hynne ka sngi, ula pynbna iaka jingthmu ban pynkynriah noh iaka Meghalaya Secretariat sha ka jaka kaba don sha khap sor bad ula pynpaw ruh ia kiba bun ki jingthmu ban pynduna iaka jingdheng kali haka nongbah Shillong.
Haba iakren bad ki nongthoh khubor, u Conrad ula iathuh ba ia ka Building ba thymmai jong ka Meghalaya Secretariat yn sa tei ha ka thaiñ Mawpat bad yn tei ruh iaki jingkieng na Barik Point ban pynduna iaka jingdheng kali ha nongbah Shillong.
“Ngi la dep ban ithuh ia ki jaka ha ki snem kiba la dep bad ka jingpynkhreh iaka Master Plan kala sdang ban iaid shakhmat. Ngi khmih lynti ba hapoh katto katne bnai, ngin lah ban ioh noh iaka jingpynwandur kaba pura bad kiwei kiwei ki bynta jong ka jingdonkam” ong u Conrad.
“Kumta, nga khmih lynti ba ha kine ki 5 snem ban wan, ngin iohi ba kan don ka jingpynduna iaka jingdheng kali ha sor Shillong, ha kaba yn pynkynriah iaka jaka treikam sha ka thaiñ Mawpat, kaba ngi khmih lynti ban tei iaka Secretariat. Ngi dang pynkhreh iaka Plan kaba pura” ula bynrap.
U Conrad ula kdew ruh ia ki jingthmu ka sorkar ban tehlakam iaka jingdheng kali haka nongbah Shillong.
Ula pynpaw ba ka sorkar ka thmu ban wanrah ia bun tylli ki lad ki lynti bad ban tei ia ki jingkieng kiba thymmai.
“Ka Shillong kala khapngiah bad ha kiba bun ki khep, ngim ioh ia ka jaka wat ban pynieng 2-3 tylli ki paia ban ioh shna ia ki surok hajrong, kum kine ki jingtynjuh ki don hynrei ngi khmih lynti ban gin lah ban pyniaid shakmat ia ki jingthmu kiba ngi la don lypa kham mynshwa ban thaw ia ki jaka pynieng kali” ula ong.
“Kila don lypa bun tylli ki jaka pynieng kali ha ka Plan jong ka Smart City bad ki kam kila sdang ban iaid halor kane ka bynta. Ngin thaw shuh shuh ia ki jaka pynieng kali, ngin shim ia ki lad ban tei ia ki Sky Walk ia kaba nga la dep ban shim rai kham mynshwa hynrei ngim shym la lah pat ban iaid shakhmat” ula bynrap.
U Conrad ula ong “Ha ka jingshisha kawei kala don lypa haka master plan bad shen ngin sa iohi ia kane bad nga kyrmen skhem ba ha une u snem ngin lah ban pyndep iaka Sky Walk kaba nyngkongeh kaban sdang na Barik point. Na ka PWD Complex shaduh Police Bazar, kan dei ka lynti iaid kjat kaban don hajrong ia kaba yn tei bad pynwandur katkum kane ka juk kaba mynta”.
Ula ong, ka sorkar ka shim ia ka jingkitkhlieh ban pynbha ia ki jingtei bad ia ka rukom pyniaid ia ki kali ha ka nongbah Shillong da ka jingthmu ban pynduna iaka jingdheng kali.
