Shillong Jylliew 20: U Myntri Rangbah ka jylla u Conrad K Sangma, hynne ka sngi u la pynbna ba ka sorkar kan ai mar T.4 Lak na ka bynta kito kiba la khlad noh naka jingtwa khyndew bad shlei um bad ruh ban ai jingiarap ruh ia ki shnong ki thaw kiba la shah ktah naka jinglynshop ka mariang.
Katei ka jingpynbna u Myntri Rangbah ka dei hadien ba u la wan jurip iaka shnong Dangar bad Kenmynsaw kiba hap ha Mawsynram Constituency ha kaba ula leit ban iakynduh ruh iaki bahaiing bahasem kiba la duh noh iala ki baieid bathoin na ka jingwan lynshop ka bor maraing ha ka 17 tarik mynta u bnai.
Ha katei ka jingjurip u Myntri Rangbah ia kitei ki shnong la iadonlang u MLA ka Mawsynram u Bah Himalaya Shangpliang, u MDC ka Mawsynram u Bah Avin Sawkmie, ki heh ophisar sorkar bad kiwei kiwei.
U Myntri Rangbah u la leit iakynduh ia ki bahaiing bahasem jong kawei ka longing ha Dangar kaba la duh noh ia ki 5 ngut ki mynsiem briew naka jingtwa khyndew kiba kynthup ia ka kmie ka Kong Kyllity Langpen (32), Daphisha Langpen (12), Daskhemlang Langpen (5), Sa I Dawanbiang Langpen (3) bad I khunlung ba dang 6 bnai
U la leit ruh sha shnong Kenmynsaw ban iakynduh ia ki bahaiing bahasem jong ki ar ngut ki shi kurim kiba la khlad noh naka jingtwa khyndew kiba kynthup ia ka Kong Drit Byrsaw bad u Bah Robino Kynter.
U Conrad Sangma u la aiti ruh iaka jingthoh kaba dei ka jingiarap pisa ia ki bahaiing bahasem kiba la duh noh iala kiba ieid bathoin ha kaba ula ai mar T.4 Lak ia kiba la khlad noh na ka jingtwa khyndew.
U Myntri Rangbah u la pynpaw ia ka jingsngewsih halor ka jingduh noh ia ki mynsiem briew naka jingwan lynshop ka bor mariang.U la ong, ka sorkar kan ialeh katba lah ban ai jingiarap ia ki lanot ha kum kane ka khyllipmat bad kan ai ruh iaka pisa ne ka Ex-Gratia kaba T.4 Lak sha kiba la khlad noh na ka jingwan lynshop ka bor mariang.
Ha ka jingiakynduh ia ki nongialam shnong, u Myntri Rangbah ula kular ba ka sorkar kan ai jingiarap ia ki jaka kiba la shah ktah jur bad ka sorkar ka dang iaid shakhmat ban pynbiang ia ka bording elektrik ha katei ka thain bad ba ki paidbah kin ioh biang iaka Network jong ki mobile phone.
Ha ka 17 tarik mynta u bnai,haduh 9 ngut ki briew kila iap tang na ka jingtwa khyndew ha Mawsynram Constituency bad kine ki kynthup ia 5 ngut ha Dangar, 2 ngut ha Kenmynsaw, 1 na ka shnong Boro Ryngku bad 1 na Betgora.
