Shillong, Jylliew 20: Ka Iingkashari Meghalaya High Court hynne ka sngi nyngkong, kala bthah ia ka Sorkar Jylla ban shim noh ia ka rai ba treikam ha kaban weng noh ia ki jingeh jingjynjar jong ki paidbah kiba shong ba sah ha ki jaka khappud jong ka Ri India bad Bangladesh kiba don ha East Jaiñtia Hills District.
Haba shong bishar ia ka PIL halor kane, ka kashari ki arngut ki Nongbishar ba kynthup ia u Chief Justice Sanjib Banerjee bad u Justice W Diengdoh kila ong “Donkam ban shim noh mardor ia ka rai ba treikam khnang ba yn lah weng noh kham kloi ia ki jingeh jong ki paidbah kane ka thaiñ happud”.
Kane ka hukum kala mih hadien ka jingpynslem jong ka Sorkar ban pyntrei ia ka surok Borghat-Sonapur.
Ka Sorkar Jylla kala ong ba wat hapdeng ka jingpyrshang katba lah, ymshym la lah ban ai ia ka Work Order namar ki nong thong ba ritduh kila aiti da ki kot ki sla ba shu thok bad ka Tender Committee ka dang khmih ia kane ka kam.
Hynrei ka Iingkashari kala ong “ La ka long kumno kumno ruh, ka jingpyniaid ia ka kam ka dei ban sted noh”.
Haba phai pat sha ka jingpynbeit ba shipor ia ka Bailey Bridge, la pyntip ba namar ka jingjur u slap, ym shym la lah ban tei ia ki paia ban kyrshan ia kane ka jingkieng bad la kyrmen skhem ba lada ka jinghap slap kala kham duna, ka jingtei pynskhem ia kane ka jingkieng kan sa sdang noh.
Ka Iingkashari kala buh ban shong bishar biang ia kane ka mukotdumaha ka 13 tarik u Naitung.
Dang shen u Symbud Myntri Rangbah ka Jylla Bah Prestone Tynsong ula pyntip ba ka Ministry of Development for North Eastern Region (DONER) kala mang pisa haduh T. 126 klur ban tei ia ka surok Borghat-Sonapur.
