Shillong, K’lyngkot 15 : U Myntri Rangbah ka Jylla Conrad K Sangma ha ka sngi Palei, ula pynbna ba ka Sorkar ka long kaba kloi ban iakren halor ka kaiphod jong ka Expert Committee on State Reservation Policy, kaba la khmih lynti ban sa wanrah ha ka Dorbar ban wan ka Iingdorbar Thaw Ain.
“Ngin sa lah ban pynbna paidbah ynda ngi lah wanrah hapoh ka Iingdorbar Thaw Ain ka ban sa long shen. Nga thikna ba ngin lah ban wanrah ia kiei kiei baroh ha Iingdorbar Thaw Ain” ula ong haba iakren bad ki nongthoh khubor.
U Conrad ula batai ba ka daw ba slem ban pyllait ia ka kaiphid ka dei namar ka jingkyllain bad ka jingjrong, kaba donkam ban hap bishar thik pa thik. “Ka dei ka kaiphod kaba jrong bha-da ki hajar hajar ki sla ki don. Man ki kyntien ki long kiba kongsan ha ka, kumta kam long kaba lah ia ngi ban shu ai tang ia ki pasoh jong kiei kiei baroh” ula bynrap.
U Myntri Rangbah ula kular ba ka Kynhun Myntri kan sa iakren shen ia kane ka kaiphod, lehse ha ka jingialang ban sa wan.
“Ngin shong ia ka jingialang ka Kynhun Myntri lashai ka sngi bad lehse ngi lah ban iakren ia kane….kumta, hapoh ka shitaiew lane shiphew sngi, ngin sa lah ban pynbna” ong u Conrad.
