Shillong, Naitung 21 : U Myntri Rangbah ka Jylla Conrad K Sangma ha ka sngi Thohdieng ula pyntip ba shen ka Jylla kan sa thung noh da ki Police Commissioner bad ka kynhun Pulit kaba khlain ha Nongbah Shillong, ban lah tehlakam ia ka suk ka sain.
Haba iakren bad ki nongthoh khubor shabar ka jingialam sam shithi thungkam ia ki samla ba iohkam pulit, u Myntri Rangbah ua ong “Kiba bun ki Nongbah ki don da ki Commissioner of Police. Hynrei, ha Shillong ngi dang don tang ha ka kyrdan Superintendent of Police.
Shisien bala wan da u Commissioner hangne ka mut ba ngin sa don da u Heh Ophisar bala trei slem ban long u Commissioner bad kin don ruh bun ki nongtrei bad ka kynhun hapoh jong u hangne ha Shillong ban tehlakam ia ka suk ka sain”.
U Myntri Rangbah ula pyntip ruh ba da ka jingthung ia u Police Commission, kan sa nang kiew ha ka jingdon ki briew (Pulit) bad ki jingtei ba donkam.
Haba kylli lano ban sat hung ia une u Commissioner, u Myntri Rangbah ula ong “..Ngi dang pynkhreh shaid shaid ia kane bad ka Sorkar ka khmih lynti ba shen ki kam ki jam baroh kin sa dep noh”.
Pule ruh: Pynkup burom ka NPYF ia 40 ngut ki samla ba pass bha ha ka SSLC bad HSSLC
