Baghmara, Lber 04 : Ban pynpur ia ka kyrdan pule Higher Education sha ki jaka ba shabar ki Sor, u Myntri Rangbah ka Jylla Conrad K Sangma ula pynbna ia ka rai bala shim ban pynsdang noh ia ka tnad pule Commerce bad Science ha ki College ka Sorkar ha Williamnagar, Baghmara bad Sohra.
U Myntri Rangbah ila pynbna ia kane ha ka jingialang plie ia ka Academic Block bad ki Hostel ki Kynthei bad Shynrang jong ka Captain Williamson Memorial Government College kaba don ha Baghmara.
“Ia ka rai la dep ban shim ban pynsdang noh ia ka tnad pule Commerce bad Science ha ki lai tylli ki College Sorkar bad shen ka kynhun Myntri kan iakynduh bad ai jingmynjur ia kane” pynbna u Myntri Rangbah ha ka jingkynhoi jong ki paidbah ha Baghmara.
Mynta, namar ka jingbym don ka tnad pule science bad commerce ha kine ki college Sorkar, da ki hajar ngut ki samla kynthei bad shynrang na ki jaka nongkyndong kila hap ban wan sha Tura ban rung klas ha ka Tura Govt College bad Don Bosco College.
Namar kane, kila hap ban pynlut bun bha namar ka jinghap sah ha ki hostel shimet lane shong wai. Kiba bun ki samla pule na ki longiing ba duk, wat hapdeng ka jinglah jong ki ban pule ha ka science bad commerce, kim banse ban kynran dien noh ha ki jaka nongkyndong.
Ban pynkut ia kane ka jingeh, u Conrad ula ong ba ka Sorkar kan don jingangnud ban kyntiew ia ka jingpule science bad commerce haba buh hakhmat ia ka jingnep jabieng jong ki samla ka Jylla.
“Ngi la iohi dalade ia ka jingangnud bad jingthrang jong ki samla ban pule ia ka science bad mathematics. Ha kiba bun ki jingiakop lehkai chess kaba donkam ban khein jingkhein, ngi la shem ba ki samla jong ngi kila paw bha shakhmat. Khlem ka sap bad ka jinghikai kumno yn lah ban long satang lada don ka jingnang jingtip ia ka science bad ka mathematic hapdeng ki samla. Ngi donkam ban shu ai ka kabu ia ki” ong u Myntri Rangbah.
Lada ki kam ki jam ki iaid beit, ka Sorkar ka angnud ban sdang noh ia ka tnad science bad commerce ha Williamnagar, Vaghmara bad Sohra ha une u snem pule ba mynta uban sdang naduh u Jymmang bad Jylliew.
