Shillong, Nohprah 17: U Myntri Rangbah ka Jylla Conrad K Sangma hynne ka sngi Ba-ar ula ban jur ia ka jingdonkam ban buh noh ia ki kot jong ki nongwadbniah (researchers) ia ka kolshor bad ki dustur jong ki paid riewlum ka Jylla Meghalaya ha ki College bad ki University ban tip ka pyrthei.
U Conrad ula kren ia kane haba pyllait paidbah ia ki kot wad bniah (research project) bala leh da ka Researcg and Development Committee jong ka Khasi Hills Autonomous District Council (KHADC).
Ha kane ka sngi u Myntri Rangbah u la pyllait paidbah iaki kot wad bniah halor ka pateng u Khasi, kynthup ia ka jingsumar ia ka mariang lyngba ki rukom tynrai, ki dawai tynrai bad jingsumar ia ki nongpang na kylleng ki jaka (health tourism), ka dustur ai jait Kmie, bad ki rukom shongkha shongman ha ka imlang sahlang u Khasi, bad kiwei kiwei.
Ula Conrad ula pynbna ba ia kine ki kot wadbniah ba ula pyllait hynne ka sngi yn sa buh lut ha ki Library jong baroh ki College bad ki Univeristy kiba don hapoh ka Jylla.
Haba iaroh ia ki nongwadbniah (research) kiba leh ia kine ki project, u Conrad ula pynpaw “ Ngan sa thoh sha u Myntri ka Tnad Pule Puthi ka Sorkar Pdeng ba ailad ha kaban buh noh ia ki katto katne ki kot wadbniah ha ki library jong ki skulbah ka Sorkar Pdeng namar ki briew ki donkam ban pule, sngewthuh bad tip shaphang ka imlang sahlang ki riewlum ka Meghalaya.
“Ki briew ki donkam ban pule, sngewthuh, bad tip shaphang ki jaitbynriew riewlum jong ka thain shatei lammihngi. Kine ki kot ki dei ka jingpynpaw ia ki jingshemphang bad ka pateng jong ki riewlum kaba lah ban iasam bad ki paidbah kiba bun” ong u Conrad.
Kane ka Project jong ka KHADC ka dei kaba la bei pisa lyngba ka Grant ba T.50 lak na ka Ophis u Myntri Rangbah ka Jylla, da ka jingthmu ban pynneh pynsah bad kyntiew ïa ki riti dustur bad ka kolshor u Khasi lyngba ki jingwad bniah da ki riewshemphang.
Haka jingkren u Myntri Rangbah u la pynpaw ia ka jingdonkam ban pynneh pynsah ia ki jingstad tynrai bad ban pyndonkam ia ki ha ka ban weng ia ki jingeh ka pyrthei mynta, khamtam ha ki bynta jong ka jingsumar ia ka mariang bad ka jingpynroi ia ka mariang.
“Dei ban buh jingthoh bad pynphriang ia ki riti dustur bad ki rukom leh tynrai kiba riewspah jong ngi. Ka jingstad hyndai kaba la rung ha ka kolshor jong ngi, ka lah ban ai ki lad ki lynti ban pynbeit ïa ki jingeh kiba mih kum ka jingkylla ka suiñbneng, ka koit ka khiah, bad kiwei kiwei” ong u Conrad.
U Conrad u la pynpaw ia ka jingangnud jong ka Sorkar Jylla ban kyrshan ia ki kam wad bniah kiba kum kine ha ki por ban wan, da kaba kdew ba ka jingjop jong ka jingpyrshang ka KHADC ka lah ban long kum ka nuksa ia kiwei pat ki Autonomous District Council kum ka JHADC bad GHADC bad kin bud lang.
U Myntri Rangbah u la pynpaw ba ka Sorkar Jylla ka la wanrah ruh ia ka grant ban iarap pisa ia ki nongwad bniah kaba long T.3 lak ia kito kiba trei hapoh ka tnad Art and Culture, ha kaba 40 haduh 50 ngut ki nongwad bniah kin ioh jingmyntoi.
