Shillong, Nohprah 17: U Myntri Rangbah ka jylla u Conrad K. Sangma hynne ka sngi baar ula pynbna ba ka jingpynkylla ia ka Meghalaya State Investment Promotion & Facilitation (MSIPF) Act, 2024, ka dei kaba la leh da ka jingthmu ban kyntiew ia ka ioh ka kot, ban pynbun ia ki kam ban trei ban ktah bad ban thaw ia ki lad aikam aijam ha jylla.
Kum shi bynta jong katei ka jingthmu, la thaw khnang ia ka Invest Meghalaya Agency (IMA) ban pyniaid ryntih ia ki kam ba iadei bad ka jingwan ki nongseng kam.
Haba kren ha ka jingialang ban pynsdang ia ka research programme jong ka Khasi Hills Autonomous District Council (KHADC), u Myntri Rangbah ula ong ba ka IMA kan mih bujli ia ka single-window agency, kaba ju pyniaid mynshwa da ka Tnad Industries.
Haba pdiang ia ki kam kiba la leh da ka tnad Industries kum ka nodal agency, u Conrad Sangma ula kdew ba katei ka rukom treikam kaba mynshwa kala buh ha ka jingeh ia ki nongwan seng kam sengjam. “Ka rukom treikam ka long kaba kham kyllain ha kaba ki nongseng kam ki hap ban iaid lyngba ki tnad bapher bapher kum ka tnad Bording, tnad Rep ka Riang lane tnad Kam Jngohkai nalor ban pyniaid ia ki kam ban ioh jingbit na ka single-window,” ula batai.
Ban pynbeit ia kane ka jingeh, ka sorkar kala rai ban pyniasohlang ia baroh ki tnad kiba donkam lyngba kawei ka rukom treikam bad ka committee kaba ialam da u Myntri Rangbah.
“Ngi lah sngewthuh ia ka jingdonkam ban wanrah lang ia baroh ki tnad hapoh kawei ka committee kaba khlieh da u Myntri Rangbah, ia kaba ngi khot ka IMA,” ong u Conrad.
Ka jingthaw ia ka IMA la khmih lynti ba kan pynsted ia ki kam ki jam kiba iadei bad ka jingsengkam bad ban pynbiang ia ki lad ki lynti jong ka jingiatreilang na ka bynta ki nongsengkam kaban lam sha ka jingkyntiew ia ka ioh ka kot jong ka Meghalaya.
